«Ժողովուրդ». Ինչ գույք ու ֆինանսական միջոցներ է հայտարարագրել Երևանի քաղաքապետի տեղակալ Ստեփան Մաչյանը

«Ժողովուրդ» թերթը գրում է.

«Երևանի քաղաքապետի տեղակալ Ստեփան Մաչյանը պաշտոնը ստանձնել է 2022 թվականին՝ Հրաչյա Սարգսյանի՝ քաղաքապետ եղած ժամանակ։ Նրանք միասին երկար տարիներ աշխատել են բանկային համակարգում։

Մաչյանը մինչ քաղաքապետարան գալը հանդիսացել է «Ճանապարհային դեպարտամենտ» ՊՈԱԿ-ի տնօրեն։ Մաչյանը Տիգրան Ավինյանի ընկերն է, նաև աշխատանքի և սոցիալական հարցերի նախկին նախարար Զարուհի Բաթոյանի քրոջ ամուսնու եղբայրը և վերջինիս խորհրդականն է եղել։ Նա 2022 թվականի հայտարարատու տարում հայտարարագրել է մեկ բնակարան բնազմաբնակարան բնակելի շենքում՝ Երևան քաղաքում, որը ձեռք է բերվել 2015 թվականին։

Քաղաքապետի տեղակալը տարեսկզբին հայտարարագրել է 2001 թվականին ձեռք բերած Mitsubishi մակնիշի մեքենա և տարվա ընթացքում ձեռք է բերել 2022 թվականի արտադրության Volkswagen մակնիշի մեքենա, որը բերվել է Դուբայից, և որի արժեքը կազմել է 32 հազար դոլար։ Նրա բանկային հաշիվների մնացորդները կազմել են 173 հազար դրամ, կանխիկ դրամական միջոցները՝ 12 հազար դոլար։

Նրա հաշվետու տարվա եկամուտները կազմել են 13 մլն 19 հազար դրամ, որից 10 մլն 758 հազար դրամը աշխատանքի վարձատրություն է «Երևանի քաղաքապետարանի աշխատակազմ» համայնքային կառավարչական հիմնարկից: Իսկ այն ՊՈԱԿ-ից, որը ղեկավարում էր մինչ քաղաքապետի տեղակալ դառնալը, ստացել է 2 մլն 261 հազար դրամ։

Ստացված վարկերի և փոխառությունների մայր գումարի մնացորդը հաշվետու տարում կազմել է 36 մլն 631 հազար դրամ, որից 26 մլն 53 հազար դրամը բնակարանի հիփոթեքի գումարն է։ Ընկերական միջոցներով քաղաքապետարանում տեղակալի պաշտոն զբաղեցնող Մաչյանի կինը՝ Մարիաննա Գյուլումյանը, հայտարարագիր չի ներկայացրել»։

Մանրամասները թերթի այսօրվա համարում