Փաշինյանի գլխավորությամբ մենք ունենալու ենք և՛ նոր կորուստներ, և՛ նոր պատերազմ․ Իշխան Սաղաթելյան

Օրվա իշխանությունը չի արտահայտում հայ ժողովրդի կամքը, չունի մանդատը ժողովրդի կողմից հակահայկական որևէ փաստաթուղթ ընդունելու և մենք մեր ուժերով պայքարելու ենք դրա դեմ։ Այս մասին լրագրողների հետ զրույցում ասաց ՀՅԴ Հայաստանի ԳՄ ներկայացուցիչ, ՀՀ ԱԺ «Հայաստան» խմբակցության պատգամավոր Իշխան Սաղաթելյանը։

«Կապ չունի, թե ում միջնորդությամբ է այդ կապիտուլյացիայի ծրագիրը դրվում սեղանին։ Դա անընդունելի է մեր կողմից և մենք պետք է անենք ամեն ինչ, որպեսզի չընդունվի նոր կապիտուլացիա և մեր պայքարը ուղղված է հենց դրան։ Ակնհայտ է, որ Ալիևը սպառնալիքի տակ փորձում է օր առաջ ձեռք բերված առավելությունը ամրագրել կապիտուլյացիայի տեսքով, և օրվա իշխանությունը ոչինչ չի անում դա կանխելու համար։ Այս իշխանությունը մեր երկիրը բերել հասցրել է մի կետի, որից հետո շատ դժվար է լինելու վերականգնվել։ Եթե հեռացած լինեին երկու տարի առաջ, մենք չէինք ունենա այն ամենը, ինչ ունենք այսօր»,- ասաց նա։

Անդրադառնալով ընդդիմության՝ խորհրդարան վերադառնալու մասին լուրերին ՀՅԴ գործիչը նշեց․ «Ինչ որոշում լինի՝ լինելու է խմբակցության որոշումը։ Եթե գնանք խորհրդարան, գնալու ենք մեր օրակարգով, մեր գործողություններով, անվտանգությանը վերաբերվող օրակարգերով։ Քանի որ առաջնային խնդիրը դա է»,- ասաց նա։

Ինչ վերաբերում է Ադրբեջանի կողմից տարածվող տեղեկությանը, որ Լաչինի միջանցքով հայկական կողմը զենք է տեղափոխում, և հենց այդ նպատակով կարող է փակվել այն, պատգամավորն ասաց, որ, օգտվելով մեր իշխանության ծնկի եկած իրավիճակից, Ադրբեջանը շարունակում է բռնի ուժով հասնել Հայաստանի վերջնական կապիտուլյացիայի․

«Եթե Նիկոլ Փաշինյանը մնա իշխանության՝ մենք ունենալու ենք ոչ թե մեկ, այլ՝ մի քանի կապիտուլյացիա։ Ակնհայտ է, որ 2 տարի առաջ այս օրերը, այս ժամերին ինքը ստատուս էր գրում, որ Շուշիում մարտերը շարունակվում են, հաղթելու ենք, բայց միևնույն ժամանակ, գրելուն զուգահեռ, Ալիևի հետ քննարկում էր կապիտուլյացիայի պայմանագիրը։ Ո՞նց կարելի է այս մարդուն ընդհանրապես հավատալ, կամ իր ասածներին հղում անել»,- ասաց նա։

ՀՅԴ-ական  գործիչը կարծում է, որ Փաշինյանն իր գավառական ժուլիկությամբ Հայաստանը դարձրել է աշխարհաքաղաքական շահերի բախման կիզակետ և մանրադրամ․ «Գնացել է Բրյուսել ասել է մեկ բան, Մոսկվայում՝ մեկ այլ բան, Վաշինգտոնում՝ լրիվ մի ուրիշ բան, որի արդյունքում  երկիրը, բերել հասցրել է մի կետի, որ հիմա յուրաքանչյուրն իր փայն է ուզում, էլ չեմ ասում, թե Թուրքիային ու Ադրբեջանին ինչ է խոստացել։ Չի կարելի այսպես վարել արտաքին քաղաքականություն, դրա արդյունքում  պատերազմը դարձրեց անխուսափելի, դրա արդյունքում խաղաղության կեղծ լոզունգի տակ վերջին 2 տարվա ընթացքում մենք շարունակեցինք զոհեր և կորուստներ ունենալ ու հիմա էլ երկիրը կանգնած է նույն խնդրի առաջ։ Մենք այս մարդու գլխավորությամբ ունենալու ենք և՛ նոր կորուստներ, և՛ նոր պատերազմ, սա է իրականությունը»,- նշեց նա։

Պատգամավորն ավելացրեց, որ իրավիճակից ելք ու հնարավորություն կա, ամեն ինչ վերջացած չէ, պարզապես Հայաստանին ազգային իշխանություն է պետք։

Մանրամասները՝ տեսանյութում։