Թուրքիայի հնարավոր գործողությունը Սիրիայում ուղղված չի լինի տարածքային ամբողջականության դեմ. Թուրքիա

Թուրքիայի նոր ռազմական գործողությունը Սիրիայում, որը կարող է իրականացվել Քուրդիստանի աշխատավորական կուսակցության (PKK) անդամների դեմ, ուղղված չի լինի այս երկրի տարածքային ամբողջականության դեմ։ Այս մասին ասվում է Թուրքիայի Ազգային անվտանգության խորհրդի տարածած հայտարարության մեջ։ Կառույցը հինգշաբթի նիստ է անցկացրել՝ նախագահ Ռեջեփ Թայիփ Էրդողանի նախագահությամբ։

«Թուրքիայի զինված ուժերի կողմից երկրի հարավային սահմաններին իրականացվող կամ ծրագրված գործողություններն ուղղված չեն հարևան պետությունների տարածքային ամբողջականության դեմ և անհրաժեշտ են ազգային անվտանգությունն ապահովելու համար։ Հանդիպման ընթացքում ուշադրությունը կենտրոնացած էր Սիրիայի հյուսիսում անվտանգության գոտու ընդլայնման, ինչպես նաև տարածաշրջանում ահաբեկիչների դեմ հնարավոր նոր անդրսահմանային գործողության գնահատման իրականացմանը»,- ասվում է Անվտանգության խորհրդի հայտարարության մեջ։