Արտակարգ իրավիճակ «Զվարթնոցում». ահազանգ է ստացվել, որ վայրէջք կատարած ինքնաթիռում պայթուցիկ սարք կա

Քիչ առաջ ահազանգ է ստացվել Արտակարգ իրավիճակների նախարարության փրկարար ծառայության 911 և ՀՀ ոստիկանության օպերատիվ կառավարման կենտրոններ, որ «Զվարթնոց» միջազգային օդանավակայանում քիչ առաջ «Red Wings» ավիաընկերության կողմից Մոսկվա-Երևան իրականացված թռիչքը սպասարկող ինքնաթիռում, որն արդեն վայրէջք է կատարել, պայթուցիկ սարք է տեղադրված, տեղեկացնում է shamshyan.com-ը։   

Օպերատիվորեն արդեն ժամանել են ԱԻՆ ՓԾ հրշեջ-փրկարարական ջոկատներից, սակրավորներից: Տեղում են նաև «Զվարթնոց» օդանավակայանի ոստիկանության գծային բաժնի ծառայողները, ինչպես նաև ոստիկանության կինոլոգները: ԱԻՆ-ի սակրավորները պատրաստվում են տարածքը զննել, իսկ ուղևորները անվտանգ դուրս են եկել, ուղեբեռները ստացել են, ինքնաթիռն էլ տեղափոխվել է անվտանգ տարածք, որպեսզի զննվի: Տեղում ուժեղացված ծառայություն են կատարում ՀՀ ոստիկանության պարեկային ծառայության Երևանի գնդի 3-րդ գումարտակի ծառայողները, ովքեր սահմանազատել են տարածքը՝ մինչև համապատասխան գերատեսչությունների ծառայողները կատարեն իրենց աշխատանքը: Ոստիկանությունը պարզում է ահազանգողի ինքնությունը:

Հիշեցնենք, որ այսօր նման ահազանգեր էին ստացվել երևանյան երեք առևտրի կենտրոններում պայթուցիկի առկայության մասին, սակայն դրանցից ոչ մեկում պայթուցիկ սարք չէր հայտնաբերվել։ Ռումբի առկայության մասին ահազանգ էր ստացվել նաև Կոմիտասի պողոտայի շենքերից մեկի վերաբերյալ։