Իրանն ակնարկել է Ռուսաստանին, որ Ադրբեջանի և Հայաստանի միջև սահմանները կարող են փոխվել

Իրանի արտգործնախարար Հոսեյն Ամիր Աբդոլլահիանը Մոսկվա ժամանելուն պես հայտարարել է, որ Ռուսաստանի ԱԳ նախարար Սերգեյ Լավրովի հետ նախատեսված հանդիպման ժամանակ նախատեսում է քննարկել Կովկասում տիրող իրավիճակը։ Իրանցի դիվանագետի խոսքերը մեջբերում է IRNA գործակալությունը:

«Լավրովի հետ հանդիպման ժամանակ մենք կքննարկենք մեր դիրքորոշումները Կովկասում տեղի ունեցող իրադարձությունների վերաբերյալ, - ասել է նա։ - Մենք ակնկալում ենք, որ Ռուսաստանը կարձագանքի տարածաշրջանում սահմանների հնարավոր փոփոխությանը»:

Իրանցի դիվանագետը, ամենայն հավանականությամբ, ակնարկում էր Սյունիքով հակառակորդին միջանցք տալու հավանականությունը, որը կվնասի ոչ միայն Հայաստանի, այլև Իրանի շահերին: