Արցախ կատարվող բեռնափոխադրումների արժեքն ավելացել է Ադրբեջանի կողմից գանձվող ճանապարհային հարկի և պետական տուրքի վճարի չափով․ Նարեկ Ալոյան

Արցախում կտրուկ գնաճի վտանգի մասին ահազանգում է փաստաբան Նարեկ Ալոյանը:

«Ադրբեջանի մաքսային կոմիտեի կողմից տարածված տեղեկության համաձայն՝ Ադրբեջանի մաքսային օրենսգրքի 210-րդ հոդվածի և «Պետական տուրքի մասին» օրենքի 24-րդ հոդվածի հիման վրա, Ադրբեջանի Հանրապետության տարածք մուտք գործելիս և ելքի ժամանակ օտարերկրյա պետությունների տրանսպորտային միջոցները վճարում են ճանապարհային հարկ և թույլտվության պետական տուրք։

Վերոնշյալ իրավակարգավորումների հիմքով Գորիս-Կապան միջպետական ճանապարհի վրա տեղակայված ոստիկանական պահակակետում մաքսային մարմինների ներկայացուցիչներն իրականացնում են համապատասխան գանձումներ Իրանից Արցախ բեռնափոխադրում կատարող տրանսպորտային միջոցներից։

Այսպիսով՝ Արցախ կատարվող բեռնափոխադրումների արժեքն ավելացել է Ադրբեջանի կողմից գանձվող ճանապարհային հարկի և պետական տուրքի վճարի չափով։

Նման պայմաններում Արցախում անխուսափելիորեն կարող է առաջանալ գնաճ, որն անհրաժեշտ է հնարավորինս սեղմ ժամկետում կանխել կամ զսպել։
Խնդիրն ունի երկու լուծում՝

1․ Արցախի ներկա կարգավիճակը հաշվի առնելով, դիվանագիտական խողովակներով (օրինակ՝ ՌԴ աջակցությամբ) վերացնել Արցախ կատարվող բեռնափոխադրումների համար գործող ճանապարհային հարկը և թույլտվության պետական տուրքը,

2․Մինչև խնդրի հիմնական լուծումը սպասվող գնաճը զսպելու համար ժամանակավոր սուբսիդավորում տրամադրել Արցախի տնտեսվարողներին։

Միաժամանակ, հաշվի առնելով Արցախի շուրջ ստեղծված իրավիճակում ամենօրյա փոփոխություններն, անհրաժեշտ է ստեղծել փորձառու ԴԻՎԱՆԱԳԵՏՆԵՐԻՑ և տնտեսագետներից կազմված աշխատանքային խումբ և գիտակից հանրությանը զերծ պահել անորոշության մեջ գտնվելու եղանակով խոշտանգվելու, ինչպես նաև հանցավոր ինքնավստահություն ունեցող առանձին պաշտոնյաների սխալների վտանգից»,- գրել է Ալոյանը։

Ավելի վաղ հայտնել էինք, որ Գորիս-Կապան ճանապարհի Որոտանի հատվածում ադրբեջանցիները սկսել են նաև մարդատար մեքենաները ստուգել: