Արմեն Չարչյանի առողջական վիճակը կայուն ծանր է. Էրիկ Ալեքսանյան

«Իզմիրլյան» Բժշկական կենտրոնի նախկին տնօրեն, «Հայաստան» խմբակցության պատգամավոր, պրոֆեսոր Արմեն Չարչյանի առողջական վիճակը կայուն ծանր է։ Այս մասին NEWS.am-ի հետ զրույցում հայտնել է Չարչյանի փաստաբան Էրիկ Ալեքսանյանը:

«Այսօր եմ Արմեն Չարչյանին այցելել։ Բժշկական կենտրոնի տնօրենին հարցում եմ ուղարկել, թե կոնկրետ ինչ հետազոտություններ է անցել Արմեն Չարչյանը»,-- ասաց փաստաբանը։

Ալեքսանյանն ասաց, որ Արմեն Չարչյանը գտնվում է «Քանաքեռ-Զեյթուն» բժշկական կենտրոնի վերակենդանացման բաժանմունքում։

«Գիտակցությունը տեղն է, բայց դժվարությամբ է խոսում ու շնչում»,- ասաց Ալեքսանյանը։

Հիշեցնենք, որ ՀՀ վերաքննիչ քրեական դատարանն օգոստոսի 23-ին Չարչյանին գրավի դիմաց ազատ արձակելու որոշման դեմ դատախազության բողոքը բավարարել էր։ Դատարանի որոշումից հետո Արմեն Չարչյանը սեփական նախաձեռնությամբ գնացել էր քրեակատարողական հիմնարկ, ապա՝ կալանավորվել։ Օգոստոսի 30-ին հայտնի դարձավ, որ Չարչյանի առողջական վիճակը վատթարացել է, ու նա տեղափոխվել է քաղաքացիական հիվանդանոց։