Հայ-ադրբեջանական սահմանին տիրող իրավիճակը հետևանք է սահմանի միջազգային իրավական գրանցման բացակայության. Զախարովա

Իրավիճակը Ղարաբաղում ռուս խաղաղապահների պատասխանատվության գոտում համեմատաբար կայուն է, սադրանքներ չեն գրանցվել: Այս մասին ուրբաթ կայացած ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:

«Իրավիճակը ռուսական խաղաղապահ զորախմբի պատասխանատվության գոտում մնում է համեմատաբար կայուն: Առանձին միջադեպերը անհապաղ լուծվում են՝ համագործակցելով հայ և ադրբեջանցի գործընկերների հետ: Ոչ մի սադրիչ գործողություն չի արձանագրվել ռուս խաղաղապահների դեմ», - ասել է նա:

Զախարովան շեշտել է, որ Ռուսաստանը պատրաստ է նպաստել Լեռնային Ղարաբաղում խաղաղ կյանքի հաստատմանը, ինչպես նաև Հայաստանի ու Ադրբեջանի միջեւ վստահության ամրապնդմանը:

«Ինչ վերաբերում է սահմանին: Կցանկանայի ընդգծել իրավիճակը հայ-ադրբեջանական որոշակի տարածքներում, ևս մեկ անգամ շեշտում եմ՝ մենք ելնում ենք նրանից, որ այն ուղղակիորեն կապված չէ ԼՂ-ի հետ, այլ հետևանք է սահմանի միջազգային իրավական գրանցման բացակայության»,- հավելել է նա: