ՀԱՊԿ արտահերթ նիստում կքննարկվի հայ֊ադրբեջանական սահմանին տիրող իրավիճակը

Հայ֊ադրբեջանական սահմանին հուլիսի 12֊ին Տավուշի ուղղությամբ տեղի ունեցած ռազմական բախումների պատճառով իրադրության սրմամբ պայմանավորված՝ Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Ստանիսլավ Զասի նախաձեռնությամբ հուլիսի 13֊ին ՀԱՊԿ Մշտական խորհրդի արտահերթ նիստ կկայանա։ Այդ մասին տեղեկացնում է ՀԱՊԿ պաշտոնական էջը։

Հիշեցնենք՝ ավելի վաղ ՀՀ ԱԳ նախարար Զոհրաբ Մնացականյանը հեռախոսազրույց է ունեցել ՀԱՊԿ գլխավոր քարտուղար Ստանիսլավ Զասի հետ։ Նա մանրամասն տեղեկատվություն է տրամադրել հուլիսի 12-ից Ադրբեջանի զինված ուժերի կողմից ՀՀ Տավուշի մարզի ուղղությամբ հրետանու կիրառմամբ իրականացված հրադադարի խախտումների, հուլիսի 13-ի առավոտյան այդ գործողությունների վերսկսման, ինչպես նաև իրադրության հետագա սրման հետևանքների մասին: