Ամենայն Հայոց Կաթողիկոսը հյուրընկալել է Օդեսայի հայկական մշակութային կենտրոնի սաներին

Հունիսի 29-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում հյուրընկալել է Օդեսայի (Ուկրաինա) հայկական մշակութային կենտրոնի կիրակնօրյա դպրոցի և մանկապարտեզի սաներին։ Այս մասին հայտնում են Մայր Աթոռի տեղեկատվական համակարգից

Կենտրոնի տնօրեն տիկին Աննա Գևորգյանը Նորին Սրբությանը տեղեկություններ փոխանցել է դպրոցի և մանկապարտեզի գործունեության վերաբերյալ՝ ընդգծելով, որ սաների այցը Հայաստան նպատակ է հետապնդում ճանաչել հայրենիքը։

Վերջինս նաև հայտնեց, որ 44-օրյա պատերազմի ընթացքում երեխաները հանդես են եկել համերգներով և գոյացած ողջ հասույթն ուղղել Արցախին զորակցությանը։

Այս առիթով սաները հանդես են եկել հոգևոր, ազգային ու հայրենասիրական երգերի և բանաստեղծությունների կատարումներով՝ ուրախություն պարգևելով Հայոց Հորը։

Այնուհետև Վեհափառ Հայրապետն իր հայրական օրհնությունն է բերել պատանի հայորդիներին՝ իր գնահատանքը բերելով նաև ծնողներին և մանկավարժներին սաներին ազգային ոգով կրթելու և դաստիարակելու համար։ Հայոց Հովվապետն ընդգծել է, որ նրանք հայ ժողովրդի հույսն են, կամքն ու ապագան։ Նորին Սրբությունը պատգամեց մանուկներին և պատանիներին սիրել հայրենիքը, ապրել ազգային արժեքների ոգով ու շնչով, որպեսզի կարելի լինի իրականություն դարձնել հզոր, ծաղկուն և բարօր հայրենիք ունենալու տեսլականը։

Հանդիպմանն Ամենայն Հայոց Հայրապետը գոհունակությամբ փաստել է նաև, որ Ուկրաինայի հայ համայնքում, շնորհիվ հայոց թեմի և ազգային կառույցների գործունեության, նախանձախնդրությամբ են վերաբերվում ազգային ինքնության, մշակութային և հոգևոր ժառանգության պահպանությանը, որի լավագույն դրսևորումն է հայորդիների այցը Հայաստան և Մայր Աթոռ Սուրբ Էջմիածին։ Այս առիթով Նորին Սրբությունը մաղթել է, որ Աստված զորացնի պատանի հայորդիների հոգիներում սերն առ հայրենիքը, ուժ և կարողություն պարգևի հայեցի շնչով հասակ առնելու և հայ ժողովրդի արժանավոր զավակներ դառնալու համար։

Զրույցի ընթացքում Հայոց Հայրապետը հետաքրքրվել է նաև Օդեսայի հայ համայնքի կյանքով և հայկական կառույցների գործունեությամբ։

Վերջում Ամենայն Հայոց Կաթողիկոսը «Պահպանիչ» աղոթքով օրհնեց պատանի հայորդիներին, այցի առիթով նրանց ընծայել է խաչեր ու սրբապատկերներ։