Իլհամ Ալիևը հայտարարել է, որ «Հայաստանի իշխանությունների սադրանքներն անխուսափելի էին դարձրել պատերազմը Ղարաբաղում»

Ադրբեջանի նախագահ Իլհամ Ալիևը հայտարարել է, որ Արցախյան երկրորդ պատերազմն անխուսափելի էր «Հայաստանի ղեկավարության սադրիչ հայտարարություններից և գործողություններից հետո»․ հայտնում է minval.az կայքը:

«Վերջերս տեղի ունեցած ամեն ինչի համար պատասխանատու է Հայաստանի կառավարությունը, որը ձեռնարկել է բազմաթիվ սադրիչ քայլեր, գործողություններ և հրահրել պատերազմը»,- ուրբաթ ասել է թշնամական պետության ղեկավարը՝ Բաքվում ընդունելով Ռումինիայի, Ավստրիայի և Լիտվայի արտգործնախարարներին:

Նա հիշեցրել է, որ «ՀՀ պաշտպանության նախարարը (ՊՆ նախկին ղեկավար Դավիթ Տոնոյանը) հրապարակավ հայտարարել է, որ Հայաստանը պատրաստվում է նոր պատերազմի նոր տարածքների համար, ինչը բացահայտ սպառնալիք էր Ադրբեջանի համար: Հայաստանի վարչապետը հայտարարել է, որ բանակցություններին պետք է մասնակցի նաև Լեռնային Ղարաբաղի ղեկավարությունը»:

«Իրականում դա ոչ միայն դեմ էր մեր շահերին, այլ նաև՝ ԵԱՀԿ Մինսկի խմբի և նրա համանախագահների կողմից մշակված ձևաչափին: Հայաստանի ղեկավարության մեկ այլ սադրիչ հայտարարություն այն էր, որ «Ղարաբաղը Հայաստան է, և վերջ»: Սա փաստացի վերջ դրեց  ցանկացած բանակցության»,- ասել է Ալիևը:

Նա նաև մեղադրել է Հայաստանին, որ 2020 թվականին «շփման գծում և Ադրբեջանի հետ պետական սահմանին իրականացրել է երեք ռազմական սադրանք, որի արդյունքում զոհվել են խաղաղ բնակիչներ»:

«Այսպիսով՝ Ղարաբաղյան երկրորդ պատերազմն անխուսափելի էր, և դա բոլորի համար պարզ էր»,- ավելացրել է Ադրբեջանի նախագահը: