Թուրքիան Ռուսաստանին առաջարկել է վերսկսել թռիչքները դեպի թուրքական կուրորտային շրջաններ

Թուրքիան Ռուսաստանին առաջարկել է անվտանգ զբոսաշրջության պայմանների ստեղծման մոդել, որն ավելի վաղ կիրառվել էր Գերմանիայի հետ՝ թռիչքների վերսկսում հիմնականում դեպի հանգստավայրեր. РИА Новости-ին ասել է Թուրքիայի Հանրապետության մշակույթի և զբոսաշրջության նախարար Մեհմեդ Նուրի Էրսոյը:

Նա նշել է, որ ճանապարհորդները հիմնականում գնում են Անթալիա, Բոդրում, Դալաման, իսկ ավելի հազվադեպ՝ Իզմիր:

«Եթե նայեք այս տարածաշրջաններում COVID-19 վարակի նոր դեպքերի օրական աճին, կտեսնեք, որ Թուրքիայում այն միջինից 50 տոկոսով ցածր է»,- ասել է Էրսոյը:

Ապագայում օդային երթևեկությունը, ըստ նախարարի, կարող է ընդլայնվել՝ ըստ ռուսական կողմի պահանջների բավարարված լինելու: Նա նաև շեշտել է, որ Գերմանիայի հետ նման համակարգը շատ հաջող է կիրառվել:

«Իհարկե, ամեն ինչ կախված է Ռուսաստանի իշխանությունների որոշումից, կախված է առողջապահության ոլորտում նրանց քաղաքականությունից և երթևեկի վերաբերյալ որոշումներից։ Մենք հետևելու ենք դրանց»,- հավելել է Էրսոյը:

Ռուսաստանը դադարեցրել է դեպի Թուրքիա չվերթերը ապրիլի 15-ից հունիսի 1-ը: