Հունական բանակը բերվել է բարձր մարտական պատրաստվածության՝ թուրքական ռազմանավերի պատճառով

Հունաստանի զինված ուժերը կիրակի օրը բերվել են բարձր մակարդակի պատրաստվածության Էգեյան ծովում թուրքական ռազմանավերի տեղակայումից հետո՝ կապված Հունաստանի Հռոդոս և Կաստելիորիզոյի կղզիների միջև ծովային գոտում թուրքական ռազմական վարժանքների հետ, որոնք նախատեսված են օգոստոսի 10-11-ը: Այս մասին հաղորդել է հունական մասնագիտացված Armyvoice.gr պորտալը:

Պորտալի տեղեկություններով՝ դեպի ծով թուրքական նավերի ելքի պատճառով Հունաստանի զինված ուժերը տագնապ են հայտարարել, արձակուրդները չեղյալ են հայտարարվել, իսկ զինվորականները կանչվել են իրենց ստորաբաժանումները: Մոբիլիզացիան ընթանում է արագ, հատկապես սահմանամերձ վայրերում, ինչպիսիք են Էվրոսը (ցամաքային սահմանը) և կղզիները: Հաղորդվում է, որ ավիացիան, ինչպես նաև հունական նավատորմը, որոնք Էգեյան ծովում առանցքային դիրքերում են գտնվում, բարձր պատրաստվածության են բերվել:

Հունական պաշտոնական գերատեսչությունները, իրենց սովորույթի համաձայն, չեն հերքում, բայց չեն էլ հաստատում այդպիսի տեղեկությունները:

Միևնույն ժամանակ, ըստ պորտալի, ակնհայտ է, որ թուրքական կողմից կա մեծ մոբիլիզացիա. թուրքական նավատորմի տասնյակ նավեր տեղակայված են Հռոդոսի և Կաստելորիզոյի միջև ընկած հատվածներում՝ իրենց միջազգային և տարածքային ջրերում: Իր հերթին, հունական «Open TV» հեռուստաալիքը հաղորդել է, որ 17 թուրքական նավ այժմ  գտնվում են Էգեյան ծովի ամենակարևոր դիրքերում:

Թուրքիան հայտարարել է, որ ռազմական վարժանքները կսկսվեն օգոստոսի 10-ին Հռոդոսի և Կաստելիորիզոյի միջև ծովային գոտում՝ ի պատասխան Հունաստանի և Եգիպտոսի միջև համաձայնության՝ բացառիկ տնտեսական գոտիների մասնակի սահմանազատման վերաբերյալ:

Ըստ Armyvoice.gr- ի՝ մտահոգիչ է այն, որ թուրքական հետազոտական Oruc Reis նավը և նրան ուղեկցող նավերը դադարեցրել են հայտնել իրենց գտնվելու վայրերը: Սա մեկնաբանվում է, որ նրանք ցանկանում են թաքցնել այս նավի հնարավոր ճանապարհը, չնայած նավատորմը ունի թուրքական նավերի տեղաշարժերը հետևելու միջոց:

Հունաստանի Արտաքին գործերի նախարար Նիկոս Դենդասը օգոստոսի 7-ին վերոնշյալ հեռուստաընկերությամբ հաստատեց, որ Հունաստանը կպաշտպանի իր ինքնիշխան իրավունքները բոլոր միջոցներով, եթե Թուրքիան «Օրուչ Ռեյիս» հետազոտական նավը ուղարկի հունական բացառիկ տնտեսական գոտի: «Մենք ոչ մեկին չենք սպառնում, մենք բարձրաձայն հայտարարություններ չենք անում, և մենք չունենք այնպիսի հիստերիկ ռեակցիա, որը բնորոշ է տարածաշրջանի մյուս երկրներին: Մենք պարզապես ասում ենք, որ մենք՝ որպես ինքնիշխան երկիր, մեր Սահմանադրությամբ պարտավոր ենք պաշտպանել ինքներս մեզ, և մենք դա անելու ենք ցանկացած եղանակով», - հայտարարել է Դենդիասը:

Նշենք, որ Թուրքիայի նախագահ Ռեջեփ Թայիփ Էրդողանը հայտարարել է, որ այսօրվանից վերոնշյալ թուրքական նավը կսկսի իր աշխատանքը՝ չնայած Հունաստանի հետ ձեռք բերված պայմանավորվածության՝ ի պատասխան հույն-եգիպտական պայմանագրի՝ Միջերկրականի արևելյան ջրերում բացառիկ տնտեսական գոտիների սահմանազատման վերաբերյալ։