Մոլդովայում ուղղաթիռների արտադրության գաղտնի արտադրամաս է հայտնաբերվել

Մոլդովայում հատուկ գործողության ընթացքում հայտնաբերվել է ապօրինի աշխատող մինի-գործարան, որն ուղղաթիռներ է թողարկում անօրինական մատակարարումների համար. այս մասին հայտարարություն է տարածել Մոլդովայի գլխավոր դատախազությունը, գրում է «Ինտերֆաքս»-ը։

Հայտարարությունում, մասնավորապես, նշվում է.

«Դնեստրի ափի Անվտանգության գոտում, Քիշնևից 50 կիլոմետր հեռավորությամբ, գործել է ուղղաթիռների ընդհատակյա գործարան: Այնտեղ անցկացվել է ուղղաթիռների հավաքում, որոնք Կա-26-ի վերափոխակված տարբերակն են: Ուղղաթիռներն անօրինական ճանապարհով արտահանվել են ԱՊՀ-ի երկրների շուկա: Ուղղաթիռների արտադրությունում աշխատողների մեծ մասը Մերձդնեստրի բնակիչներ են»։

Նշվում է նաև, որ խուզարկությունների ընթացքում գտել են պատրաստության տարբեր փուլերում գտնվող ավելի քան 10 ուղղաթիռ. «Դրանք չեն ունեցել ծագման փաստաթղթեր, ընդ որում մի մասն ակնհայտ ձեռքի արտադրության է»,- հստակեցրել են գերատեսչությունում:

Մանրամասնվում է նաև, որ հարուցվել է քրեական գործ թռչող ապարատների մաքսանենգության պատրաստման մասին. այդ հոդվածով պատիժը նախատեսում է մինչև տասը տարվա ազատազրկում։