Սիրիայի Աֆրին քաղաքում առնվազն 40 մարդ է մահացել բեռնատարի պայթյունի հետևանքով

Սիրիայի հյուսիսում գտնվող, բայց թուրքական օկուպացիայի տակ գտնվող Աֆրին քաղաքի շուկայում բեռնատարի պայթյունից առնվազն 40 մարդ է մահացել. հայտնում է BBC-ի ռուսական ծառայությունը։

Ըստ սահմանակից թուրքական Հաթայ նահանգի նահանգապետի՝ շուկայում վառելանյութով ցիստեռն է պայթել, որին ամրակցված են եղել ձեռքի նռնակներ։

Թուրքիայի Պաշտպանության նախարարությունը հարձակման մեղքը բարդել է Քուրդիստանի աշխատավորական կուսակցության վրա։

Բեռնատարը պայթել է Աֆրինի բաց շուկայում և տեղի է ունեցել տեղական իշխանությունների գրասենյակների մոտակայքում։

Թուրքիայի ՊՆ հաղորդագրության համաձայն՝ պայթյունից մահացել են բացառապես խաղաղ բնակիչներ, որոնցից 11-ը երեխաներ են եղել։ Եվս 47 անձ էլ վիրավորվել է։

«ՔԱԿ/ԺԻՈւ-ի (Ժողովրդական ինքնապաշտպանության ուժեր) մոլեռանդները հարձակում են գործել Աֆրինի խաղաղ բնակիչների վրա», - նշվում է Թուրքիայի ՊՆ թվիթում, սակայն չի բերվում որևէ ապացույց՝ պայթյունին քրդերի մասնակցության վերաբերյալ։

Ըստ Մարդու իրավունքների մոնիթորինգի սիրիական կենտրոնի տվյալների՝ մահացել է 40 մարդ, որից 6-ը Թուրքիայի աջակցությունը վայելող ընդդիմության զինյալներն են։

Նշենք, որ Աֆրինը 2018 թվականից գտնվում է Թուրքիայի բռնազավթման տակ։