ԵՄ դեսպանը վիրտուալ այց է կատարել Ոստիկանության ղեկավար Արման Սարգսյանին

Եվրոպական միությունը աջակցում է ժամանակակից և քաղաքացիակենտրոն ոստիկանության ծառայության ստեղծմանն ուղղված Հայաստանի ջանքերին։ Այս մասին  Yerkir.am-ը տեղեկանում է Հայաստանում ԵՄ գրասենյակի տարածած հաղորդագրությունից:

Հաղորդագրությունում նաեւ ասվում է. «Մարտահրավերներով հագեցած այս ժամանակաշրջանում՝ Եվրոպական միությունը բարձր է գնահատում ՀՀ Արդարադատության նախարարության և ՀՀ Ոստիկանության կողմից ներդրված ջանքերը, որոնց շնորհիվ անցյալ շաբաթ հաստատվել է Ոստիկանության ռազմավարությունը և դրանից բխող՝ 2020-2022 թվականների Գործողությունների ծրագիրը և պատրաստ է համախմբել ուժերը դրանց վաղ իրականացման ուղղությամբ։

Այսօր ԵՄ դեսպան Անդրեա Վիկտորինը վիրտուալ քաղաքավարության այց է կատարել Ոստիկանության ղեկավար Արման Սարգսյանին, որի ընթացքում դեսպանը շնորհավորել է նրան և քննարկել Ոստիկանության ոլորտի բարեփոխումների ուղղությամբ ԵՄ-Հայաստան նոր գործընկերության մանրամասները՝ վերահաստատելով ընթացող բարեփուխումների աջակցությունը խորացնելու ուղղությամբ ԵՄ հանձնառությունը»: