Սահակաշվիլին հնարավոր է Ուկրաինայի փոխվարչապետ նշանակվի

Ուկրաինայի Գերագույն ռադան հնարավոր է քննարկի Օդեսայի նախկին նահանգապետ, Վրաստանի նախկին նախագահ Միխեիլ Սահակաշվիլիին երկրի կառավարությունում բարձր պաշտոնի նշանակելու հարցը. տեղեկացնում է yerkir.am-ը` ուկրաինական «Օբոզրևատել»-ին հղումով:

«Սլուգա նարոդա» խորհրդարանական խմբակցության անդամ Եվգենյա Կրավչուկը հայտարարել է, որ Սահակաշվիլիին, հավանորեն, կառաջարկվի բարեփոխումների գծով փոխվարչապետի պաշտոնը: Ըստ նրա` հարցը ներկայումս ակտիվորեն քննարկվում է խմբակցությունում, իսկ քվեարկությունը, հավանաբար, կլինի Ռադայի` ապրիլի  24-ի արտահերթ նիստում:

Այդ սենսացիոն նշանակման մասին գրում են նաև ուկրաինական այլ ԶԼՄ-ներ: Ըստ Liga.net-ի`որոշումը համարյա կայացված կարելի է համարել, քանի որ Սահակաշվիլիին պաշտոնն առաջարկել է Ուկրաինայի նախագահ Վլադիմիր Զելենսկին:

Պաշտոնական որևէ հայտարարություն դեռևս չի արվել:

Հիշեցնենք, որ Միխեիլ Սահակաշվիլին 2017-ի հուլիսին կորցրեց Ուկրաինայի քաղաքացիութւունը` երկրի նախկին նախագահ Պյոտր Պորոշենկոյի համապատասխան հրամանով: Դրա պատճառը իբր որոշ տվյալներ էին, որոնք Սահակաշվիլին թաքցրել էր ուկրաինական անձնագիր ստանալիս: 2018-ի փետրվարին Սահակաշվիլին արտաքսվեց Լեհաստան: Սակայն մայիսի 28-ին նորընտիր նախագահ Զելենսկին վերադարձրեց նրա ուկրաինական քաղաքացիությունը:

Մինչ օրս որևէ կանխանշան չկար, որ Սահակաշվիլին պատրաստվում է վերադառնալ ուկրաինական քաղաքականություն: Ըստ EADaily-ի` դա, հավանորեն, նրա համար էլ է անսպասելի, քանի որ ապրիլի 20-ին Սահակաշվիլին իր ծառայություններն էր առաջարկել Վրաստանի կառավարությանը: