«Գյումրու ինֆեկցիոն հիվանդանոցի» հակատուբերկուլյոզային մասնաշենքն ամբողջությամբ վերածվել է մեկուսարանի

Այս օրերի ընթացքում «Գյումրու ինֆեկցիոն հիվանդանոցը» աշխատում է արտակարգ ռեժիմով, տեղեկացնում է Շիրակի մարզպետարանի ֆեյսբուքյան էջը։

Հիվանդանոցի նախկին հակատուբերկուլյոզային մասնաշենքը ամբողջությամբ վերածվել է մեկուսարանի, որտեղ իրականացվում են նմուշառման և մեկուսացման գործընթացներ։ Վերոնշյալ գործառույթների իրականացմանն անցած օրերի ընթացքում աջակցել են Շիրակի մարզում գործունեություն ծավալող մի շարք կազմակերպություններ, տնտեսվարողներ և անհատներ։

Շնորհակալություն ենք հայտնում «Հայկական Կարիտաս»-ին՝ բուժանձնակազմին պաշտպանիչ բժշկական արտահագուստ և ակնոցներ տրամադրելու, Գյումրու Ռոտարի ակումբին և «Ռոյալ» կահույքի խանութին՝ տեսահսկման սարքավորումների, «Արմտեքս գրուպ» ընկերությանն ու Մարալիկի մանվածքային ֆաբրիկային սպիտակեղեն և անկողնասարքեր, ինչպես նաև «Պիր» խոհարարական սրահին տաք սնունդ տրամադրելու համար։

Այս փուլում կարևոր է բոլորի աջակցությունը։