Կորոնավիրուս. Իտալիան փակում է գրեթե բոլոր խանութները՝ ԱՀԿ-ի՝ պանդեմիա հայտարարելու ֆոնին

Իտալիայում կորոնավիրուսի տարածման ֆոնին գրեթե ողջ կոմերցիոն գործունեությունը դադարեցվում է, բացառությամբ մթերային խանութների ու դեղատների աշխատանքի. այս մասին գրում է BBC-ն՝  վկայակոչելով երկրի վարչապետ Ջուզեպպե Կոնտեի հայտարարությունը. հայտնում է Yerkir.am-ը:

«Ես բարձր եմ գնահատում Ձեր ջանքերը, սակայն եկել է հաջորդ քայլն անելու ժամանակը։ Մենք դադարեցնում ենք ողջ կոմերցիոն գործունեությունը, փակում վաճառքի կետերը, բացառությամբ մթերային խանութների ու դեղատների»,-նշել է Կոնտեն։

Նշվում է՝ ողջ երկրում փակվում են նաև ռեստորաններն ու բարերը, սակայն սննդի առաքման ծառայությունը հասանելի կլինի։

Աշխատանքը կշարունակեն բանկերը, փոստը, ապահովագրական և ֆինանսական ընկերությունները։ Հասարակական տրանսպորտը ևս կշարունակի գործել։

Կոնտեն կոչ է արել գործատուներին աշխատողներին արձակուրդ ուղարկել կամ կազմակերպել նրանց աշխատանքը տնից։

Ըստ վերջին տվյալների՝ երկրում վարակված է 12 հազար մարդ, որից ավելի քան 800-ը մահացել են։

Yerkir.am-ն ավելի վաղ տեղեկացրել էր, որ չինական Ուհան քաղաքում բռնկված ու ողջ աշխարհում տարածում գտնող անհայտ տիպի կորոնավիրուսով վարակվածների թիվն օր օրի աճում է։ Կորոնավիրուսի բռնկման մասին չինական իշխանությունները ԱՀԿ-ին տեղյակ էին պահել  դեռևս դեկտեմբերին:

Մարտի 12-ի ժամը 10.13-ի դրությամբ ողջ աշխարհում հաստատվել է կորոնավիրուսով վարակման 126.254 դեպք, որից 4.637-ը՝ մահվան, և 68.266-ը՝ առողջացման:

Հիշեցնենք՝ Եվրոպայում ավելի քան 9000 հայտաբերված վարակակիր կա, որից 2/3-ը բաժին է ընկնում Իտալիային, վարակման ավելի քան 700-ական դեպքեր են գրանցվել Ֆրանսիայում և Գերմանիայում։ Առաջին անգամ կորոնավիրուս է հայտնաբերվել նաև Մոլդովայում։

Հայաստանում այս պահին կորոնավիրուսի հաստատված 4 դեպք կա: 

Ավելի վաղ տեղեկացրել էինք՝ Առողջապահության համաշխարհային կազմակերպությունը նոր կորոնավիրուսի պանդեմիա է հայտարարել աշխարհում: ԱՀԿ գլխավոր տնօրեն Թեդրոս Ադհանոմ Գեբրեյեսուսը նշել էր.

«Առաջիկա օրերին և շաբաթներին ակնկալվում է, որ կորոնավիրուսով համակված երկրների, վարակվածների և մահացության դեպքերի թիվը կավելանա: Այն գնահատականին ենք եկել, որ COVID19 կորոնավիրուսը կարող է բնութագրվել որպես համավարակ»:

Նշենք՝ համաճարակ են անվանում արտասովոր ուժեղ տարածում գտած համաճարակը, որը բնութագրվում է ինֆեկցիոն հիվանդության տարածմամբ երկրի ողջ տարածքում, ինչպես նաև հարևան երկրների, երբեմն էլ՝ աշխարհի բազմաթիվ երկրների տարածքներում: