Հրայր Թովմասյանի գործով տեղեկություններ ունեմ և պատրաստ եմ տրամադրել. Դավիթ Հարությունյան

ՀՀ արդարադատության նախկին նախարար, պատգամավոր Դավիթ Հարությունյանը գրավոր դիմում է ներկայացրել Հատուկ քննչական ծառայություն՝ նոտարական պալատի կողմից տարածքի վարձակալության մասով իր ունեցած տեղեկությունները հայտնելու համար: «Պրեսսինգ» հաղորդաշարի ժամանակ, անդրադառնալով ՍԴ նախագահ Հրայր Թովմասյանի դեմ հարուցված քրեական գործին, Հարությունյանը նշել է, որ առաջարկ է ներկայացրել ՀՔԾ-ին, ըստ որի պատրաստ է տրամադրել իր ունեցած տեղեկությունները:

ՀՔԾ-ն դեռևս ոչ մի պատասխան չի տվել:

 «Չեմ ուզում բացել փակագծերը, թե ինչ տեղեկատվության եմ տիրապետում, բայց կարող եմ ասել, որ այն, ինչ ներկայացվել է հաղորդման երկրորդ դրվագում, իրականության հետ որևէ աղերս չունի: Այն ծայրահեղ մանիպուլատիվ մոտեցում էր», - հայտարարեց Հարությունյանը՝ անդրադառնալով օրերս Հրայր Թովմասյանի վերաբերյալ Հանրային հեռուստաընկերությամբ ցուցադրված տեսանյութին:

Ըստ Դավիթ Հարությունյանի՝ խախտվել է անմեղության կանխավարկածը, իսկ դա ոչ թե բառակապակցություն է, այլ Սահմանադրությամբ ամրագրված մարդու իրավունք, որը խախտելով, վարչապետն ուղերձ է հղել հանրությանը, որ պատրաստ է խախտելու ցանկացածի իրավունք:

«Սա նաև սոսկալի ճնշում է դատական իշխանության վրա, դեռևս դատական պրոցես տեղի չի ունեցել, կարծես թե, վերջնական դատական վճիռն է արձակվում և ուղերձ է հղվում դատարաններին, թե ինչ է իրենցից ակնկալվում», - ասաց Հարությունյանը: