Լրագրողը ոստիկանության ծառայողից խոշոր չափերով շորթում է կատարել

ՀՀ Քննչական կոմիտեում ավարտվել է լրագրողի կողմից Ոստիկանության պաշտոնյայից խոշոր չափերով շորթում կատարելու դեպքի առթիվ հարուցված քրեական գործի նախաքննությունը:

ՔԿ-ից Yerkir.am-ին հայտնում են, որ լրագրողը, ով տարիներ շարունակ զբաղվել է լրագրողական գործունեությամբ, իսկ վերջին շրջանում որպես լրագրող թղթակցել է լրատվական կայքերից մեկին, Ոստիկանության պաշտոնյայից խոշոր չափերով շորթում է կատարել՝ վերջինիս վերաբերյալ, իբր, արատավորող տեղեկություններ չհրապարակելու դիմաց:

Այսպես՝ 2019թ. հունիսի 18-ին լրագրողն իր նախաձեռնությամբ այցելել է ՀՀ ոստիկանությունում աշխատող պաշտոնատար անձին, ներկայացել որպես լրագրող և հայտնել, թե, իբր, իրեն հայտնի են վերջինիս կողմից ձեռնարկատիրական գործունեությամբ զբաղվելու և այդ առնչությամբ պետության հանդեպ շուրջ 41.000.000 ՀՀ դրամ գումարի չափով չկատարված հարկային պարտավորությունների վերաբերյալ տեղեկություններ՝ սպառնալով, որ դրանք կարող են հրապարակվել մի քանի լրատվական կայքերում, ինչի արդյունքում նա կվարկաբեկվի և կազատվի զբաղեցրած պաշտոնից:

Քննության տվյալներով՝ լրագրողը պաշտոնատար անձին արատավորող, նրա իրավունքներին ու օրինական շահերին էական վնաս պատճառող տեղեկությունները չհրապարակելու համար ներկայացրել է խոշոր չափերի՝ 800.000 ՀՀ դրամ գումար հանձնելու պահանջ՝ սպառնալով հակառակ պարագայում հիշյալ տեղեկությունները տարածել լրատվական կայքերում և հեղինակազրկել նրան:

Գումարն ստանալու նպատակով լրագրողը Ոստիկանության պաշտոնյայի աշխատասենյակում հանդիպել է վերջինիս և որպես ակնկալվող գումարի վերջնական չափ նշել և առձեռն ստացել է ընդհանուր 400.000 ՀՀ դրամ գումար, ինչից հետո բռնվել է ոստիկանության ծառայողների կողմից:

Լրագրողին մեղադրանք է առաջադրվել՝ ՀՀ քրեական օրենսգրքի 182-րդ հոդվածի 2-րդ մասի 3.1 կետով: Նրա նկատմամբ թույլատրելի է համարվել այլընտրանքային խափանման միջոց գրավի կիրառումը:

Հայտարարվել է նախաքննության ավարտի մասին: