Լիբանանում Թուրքիայի դեսպանատան դարպասին փակցվել է գանգով թուրքական դրոշ

Լիբանանի մայրաքաղաք Բեյրութում գտնվող՝ Թուրքիայի դեսպանատան դարպասին փակցվել է թուրքական դրոշ, որի վրա պատկերված է  եղել գանգ՝ խորհրդանշող Օսմանյան Թուրքիայի արյունարբու կերպարը, իսկ վրան գրված է եղել՝ «Դուք ձեր տեղը նստեք». հաղորդում է ermenihaber.am կայքը՝ Lebanondebate.com-ին հղումով:

Ըստ աղբյուրի՝ պաստառը փակցրել են լիբանանցի երիտասարդները, այն բանից հետո, երբ Թուրքիայի ԱԳՆ-ն  պատասխանել էր Լիբանանի նախագահ Միշել Աունի հայտարարությանը:

Նշենք, որ Լիբանանի նախագահը երկրի հիմնադրման 100-ամյակի կապակցությամբ ունեցած ելույթի ժամանակ Օսմանյան կայսրությունը որակել էր որպես ահաբեկչական և նշել, որ դրա հետևանքով հարյուրհազարավոր լիբանանցիներ են մահացել, իսկ ի պատասխան այս հայտարարության, Թուրքիայի ԱԳՆ-ն Աունի հայտարարությունը որակել էր որպես անհիմն և անպատասխանատու: