Հայաստանի զինծառայողներն առաջատարն են «Խաղաղության մարտիկ» մրցույթում

Հայաստանի Հանրապետության զինված ուժերի ներկայացուցիչները առաջատարն են Տավուշի մարզում ընթացող «Խաղաղության մարտիկ» միջազգային մրցույթում: Օգոստոսի 9-ին, ՀՀ պաշտպանության նախարարության՝ Տավուշի մարզում գտնվող լեռնային զորավարժարանում ավարտվել է մրցույթի «Մարզիկ» մրցափուլը:

Մրցափուլի վարժություններն անցկացվել են երկու փուլով՝ օգոստոսի 8-ին և 9-ին: Առաջին օրը զինծառայողներն իրենց ուժերը չափել են ձգում վարժությունում, նռնակների և դանակների ճշգրիտ և հեռահար նետման վարժություններում, 100 մ վազքում և իգական սեռի ներկայացուցիչների համար նախատեսված համալիր վարժություններում:

Երկրորդ օրը արական սեռի ներկայացուցիչ զինծառայողներն իրենց ուժերը փորձել են կալաշնիկով ինքնաձիգից թիրախների խոցում և այլ վարժություններում:

«Մարզիկ» մրցափուլում հաղթանակ է տարել Ռուսաստանի թիմը, երկրորդ տեղում Ղազախստանի ընտրանին է, երրորդում ՀՀ Զինված ուժերի զինծառայողները:

Մրցույթի ընդհանուր արդյունքներով այս պահին առաջին հորիզոնականում են Հայաստանի զինծառայողները, երկրորդում՝  Ռուսաստանի, իսկ երրորդում՝ Ղազախստանի ընտրանին է: