Ռուսաստանը և Թուրքիան կանխեցին մեծ ողբերգություն Իդլիբում. Էրդողան

Թուրքիան և Ռուսաստանը, բազմաթիվ ոլորտներում պահպանելով սերտ հարաբերություններ, մեծ առաջընթաց են գրանցել սիրիական կնճռի կարգավորման գործընթացում և կանխել են Իդլիբում մարդասիրական ողբերգությունը, հայտարարել է Թուրքիայի նախագահ Թայիփ Էրդողանը:Տեղեկացնում է РИА НОВОСТИ-ն:

«Մենք Ռուսաստանի հետ սերտ հարաբերությունների մեջ ենք սկսած Սիրիայից ընդհուպ էներգիայի եւ զբոսաշրջության ոլորտներ: Մինչև տարեվերջ կավարտենք «Թուրքական հոսք» գազատարի շինարարությունը, որի միջոցով ռուսական գազը կհասնի Եվրոպա: Ռուսաստանի Դաշնության հետ միասին  զգալի առաջընթաց ենք գրանցել Սիրիայում և կանխել ենք մեծ ողբերգությունը Իդլիբում», - ասել է Էրդողանը ՝ ելույթ ունենալով Անկարայում Թուրքիայի դեսպանների խորհրդաժողովում:

Նա հավելել է, որ Սիրիայում սահմանադրական հանձնաժողովի ձևավորման գործընթացը մոտ է ավարտին:

Սիրիայում զինված հակամարտությունը շարունակվում է 2011-ի մարտից ի վեր: 2018-ի սեպտեմբերի 17-ին, Սոչիում Ռուսաստանի և Թուրքիայի պաշտպանության նախարարները ստորագրել են հուշագիր՝ Իդլիբի դեէսկալացիոն գոտում իրավիճակը կայունացնելու վերաբերյալ՝ պայմանավորվածություն ձեռք բերելով ստեղծել ապառազմականացված գոտի: