ՀՄԸՄ-ի Լիբանանի Մասնաճիւղերու Կազմակերպական Սեմինար

Կազմակերպութեամբ ՀՄԸՄ-ի Լիբանանի Շրջանային վարչութեան կազմակերպչական յանձնախումբին հինգշաբթի, 25 յուլիսին, երեկոյեան ժամը 8:00-ին տեղի ունեցաւ վարչութիւններու միջդիւանական սեմինարը, «Ազատամարտ» ակումբի «Չուխատարեան» սրահին մէջ, մասնակցութեամբ ՀՄԸՄ-ի Պէյրութի, Պուրճ Համուտի, Ճիւնիի, Անթիլիասի, Ժտէյտիի եւ Ռաուտայի մասնաճիւղերու վարչութիւններու դիւաններուն:

Շրջանային վարչութեան բարի գալուստի խօսքէն ետք, ատենադպիր Հայկ Թապաքեան ներկայացուց ատենադպիրին ու ատենապետին պարտականութիւնները, իսկ Շրջանային վարչութեան գանձապահ Սիլվա Սաղրեան` հաշուապահական գործունէութեան կարեւորութիւնն ու աշխատելաձեւը:

Դադարէն ետք տեղի ունեցաւ կանոնագիրի ու ժողովական կեանքի կարեւորութեան նիւթով դասախօսութիւնը, որ ներկայացուց Շրջանային վարչութեան անդամ Յակոբ Չպլաքեան: Այնուհետեւ յանձնախումբը ներկայացուց հիմնական գիտելիքներ ու գործնական աշխատանքներ` հեզասահ դարձնելու համար մասնաճիւղերուն գործունէութիւնը:

Օրակարգի վերջին կէտով ներկաները լուսաբանական հարցումներով ու շինիչ առաջարկներով իրենց պատկերացումները ներկայացուցին:

Շրջանային վարչութիւնը յատուկ կարեւորութիւն կ՛ընծայէ իր շրջանի կազմակերպական վիճակին` աւելի եւս ամրագրելու միութեան կազմակերպական գործունէութիւնը, որպէսզի  նոյն թափով եւ յաւելեալ բծախնդրութեամբ մօտենանք ՀՄԸՄ-ի հիմնադրութեան երկրորդ 100-ամեակին: