Տյումենի մարզում տեղի ունեցած վթարի հետևանքով տուժել են ՀՀ-ից դեպի Օմսկ ուղևորվող միկրոավտոբուսի վարորդն ու 2 ուղևոր

ՌԴ Տյումենի մարզում տեղի ունեցած վթարի հետևանքով տուժել են ՀՀ-ից դեպի Օմսկ ուղևորվող Toyota մակնիշի միկրոավտոբուսի վարորդը (ծնված՝ 1988թ․) և երկու ուղևոր (ծնված՝ 1998թ․ և 1976թ․), տեղեկանում ենք ՌԴ-ում ՀՀ դեսպանության ֆեյսբուքյան էջից:

Դեսպանությունը մշտական կապ է պահպանում ՌԴ համապատասխան մարմինների հետ։

Հիշեցնենք, որ ավելի վաղ ՌԴ պետավտոտեսչության մարզային վարչությունը հաղորդագրություն  էր տարածել, որում նշվում է, որ բախվել են Հայաստանից մեկնած և Օմսկ ուղևորվող Toyota միկրոավտոբուսը և Renault Logan մակնիշի ավտոմեքենան: 

Հավելվում է նաև, որ ավտովթարի հետևանքով 1 կին է մահացել, ևս 6 անձ տուժել է, այդ թվում`15-ամյա դեռահաս:

Դեպքը տեղի է ունեցել կիրակի երեկոյան՝ Իշիմ քաղաքի մոտակայքում գտնվող մայրուղում: