Շրի Լանկայում արգելվել է դեմքը ծածկող զգեստների կիրառումը

Շրի Լանկան արգելել է հանրային վայրերում դեմքը ծածկող զգեստների կրումն այն բանից հետո, երբ երկրում Սբ Զատիկի կիրակի օրը տեղի ունեցած արյունահեղ պայթյունները խլեցին ավելի քան 250 մարդու կյանք` միևնույն ժամանակ վիրավորելով հարյուրավորներին: Այս մասին տեղեկացնում է BBC-ն: 

Երկրի նախագահ Մաիթրուիպալա Սիսիրսենան հայտարարել է, որ ինքը կիրառում է «արտակարգ օրենքը», որպեսզի սահմանափակումները պարտադրվեն արդեն իսկ երկուշաբթի օրվանից: «Դեմքը ծածկող յուրաքանչյուր իր, որը հնարավորություն չի տալիս նույնականացնելու անձին», կարգելվի` ելնելով ազգային անվտանգությունից»,- ասել է նա:

Մուսուլման կանանց դեմքը փակող նիքաբի և բուրքայի մասին, սակայն հայտարարության մեջ չի նշվում: Այնուամենայնիվ, այս քայլը ուղղված է դեմքը փակող բոլոր աքսեսուարների կիրառման դեմ:

Հավելենք, որ Շրի Լանկան ունի ավելի քան 21 միլիոն բնակչություն, որոնցից 10%-ը` մուսուլման:  Նրանք այս երկրում են հաստատվել դարեր առաջ: