Էրդողանը` աշխարհի ամենապոպուլիստ առաջնորդների շարքում

Բրիտանական The Guardian պարբերականը հրապարակել է աշխարհի պոպուլիստ առաջնորդների ցուցակը, որում տեղ են գտել 40 երկրի 140 առաջնորդներ:

Պարբերականը ուսումնասիրել է վերջին 20 տարում աշխարհի առաջնորդների ելույթները: Ըստ «Գլոբալ պոպուլիզմի տվյալների բազա» անվամբ ուսումնասիրության` ամենապոպուլիստ առաջնորդ է ճանաչվել Վենեսուելայի նախկին առաջնորդ Ուգո Չավեսը, նրան հաջորդում է Վենեսուելայի ներկայիս նախագահ Նիկոլաս Մադուրոն, այնուհետև` Բոլիվիայի նախագահ Էվո Մորալեսը:

Չորրորդ հորիզոնականում է Թուրքիայի նախագահ Ռեջեփ Թայիփ Էրդողանը, որը երկիրը ղեկավարել է 2003-2014 թթ. որպես վարչապետ, այնուհետև 2014-ից մինչ օրս` որպես նախագահ: Ըստ պարբերականի` իր ղեկավարության սկզբնական փուլում` 2003-2007 թթ., Էրդողանը պոպուլիստ չէր, 2007-2014-ին «մի քիչ պոպուլիստ» դարձավ, իսկ 2014-2018 թթ.` «շատ պոպուլիստ»: 

Թուրքիան նաև ճանաչվել է պոպուլիզմում ամենամեծ աճ գրանցած երկիր:

ԱՄՆ-ը ցուցակում 13-րդն է, իսկ Ռուսաստանը` 18-րդը: