Զարիֆը կարող է վերադառնալ. «Ֆարս»

Պահպանողականներին մոտ կանգնած «Ֆարս» լրատվական գործակալությունը հաղորդել է Մոհամմադ Ջավադ Զարիֆի վերադառնալու հնարավորության մասին: Վկայակոչելով ԱԳՆ-ում իր աղբյուրին` «Ֆարս»-ը նշել է, որ Զարիֆը մեծ հավանականությամբ կմտափոխվի և կվերադառնա ԱԳՆ ղեկավարի պաշտոնին:

«Պարոն Զարիֆը զգացական մարդ է, և դա էլ երբեմն նրա կողմից զգացական որոշումներ կայացնելու պատճառ է դառնում: Կոնկրետ այս դեպքի կապակցությամբ, իմ ունեցած տեղեկության համաձայն, նա մեծ հավանականությամբ կմտափոխվի և կվերադառնա»,- նշել է «Ֆարս»-ի հավաստի աղբյուրը:

Պահպանողական լրատվամիջոցը փորձել է Զարիֆի հրաժարականը վերագրել նախագահի աշխատակազմի թերացմանն ու նրա և նախագահ Ռոհանիի միջեւ գոյություն ունեցող տարաձայնությանը: «Պարոն Զարիֆի հրաժարականի պատճառը նախագահի աշխատակազմի բացթողումն է եղել: Նրան չեն տեղեկացրել Բաշար Ասադի այցի մասին: Վերջին ամիսների ընթացքում որոշակի տարաձայնություններ էին առաջացել նախագահ Ռոհանիի և Զարիֆի միջև: Վերջին միջադեպը լցրեց Զարիֆի համբերության բաժակն ու նրա հրաժարականի պատճառը դարձավ»»,- ասել է «Ֆարս»-ի անանուն աղբյուրը: