Երուսաղեմի հայկական խեցեղենը առաջարկում են ՅՈՒՆԵՍԿՕ-ի համաշխարհային ժառանգության ցուցակում ներառել

Երուսաղեմի հայկական խեցեղենը  պետք է ներառվի ՅՈՒՆԵՍԿՕ-ի համաշխարհային ժառանգության ցուցակում:  Այս մասին  գրում է Էլազար Նուդելը  «Jerusalem Post» կայքի իր հոդվածում:

Հեղինակը ներկայացնում է 6 կետից բաղկացած ցուցակ, որն, ըստ նրա, պետք է ներառվի ՅՈՒՆԵՍԿՕ-ի ցուցակում:

«1922 թվականից հայկական ձեռագործ կավե սպասքը տարածված երեւույթ դարձավ Երուսաղեմում:  Հայկական կավե ամանների ծաղկազարդ նախշերը դարձան Երուսաղեմի արհեստի այցեքարտը»,- նշվում է հոդվածում:

Իսրայելական ազգային պարը, հրեական շոֆար ծիսական հոգևոր երաժշտական գործիքը, եբրայերենով գրված ժամանակակից պոեզիան, Հնգամատյանի ընթերցումը եւ համիրյան հարսանեկան ծեսը նույնպես պետք է ընդգրկվեն ցուցակում:

Ի դեպ, 2019 թվականի հունվարի 1-ին ԱՄՆ-ն ու Իսրայելը պաշտոնապես դուրս եկան ՄԱԿ-ի կրթության, գիտության եւ մշակույթի կազմակերպությունից (ՅՈՒՆԵՍԿՕ): Պատճառը Իսրայելի նկատմամբ կանխակալ վերաբերմունքն էր: