Արտահերթ ընտրությունների համար ԿԸՀ-ին, ոստիկանությանը և արդարադատության նախարարությանը կտրամադրվի մոտ 3 մլրդ դրամ

Կառավարության հերթական նիստն այսօր վարում է  առաջին փոխվարչապետի պաշտոնակատար Արարատ Միրզոյանը:

Կառավարությունն ընդունեց 2018 թվականի դեկտեմբերի 9-ին կայանալիք արտահերթ ընտրությունների նախապատրաստման նպատակով ԿԸՀ-ին, արդարադատության նախարարությանը և ոստիկանությանը համապատասխան քանակի միջոցներ տրամադրելու մասին որոշումը:

Հիմնական զեկուցող` արդարադատության նախարարի պաշտոնակատար Արտակ Զեյնալյանն ասաց, որ նախագծով առաջարկվում է կառավարության պահուստային ֆոնդից ԿԸՀ-ին հատկացնել 2 մլրդ 707 մլն 144 հազար 200  դրամ գումար, արդարադատության նախարարությանը` 10 մլն դրամ` Ընտրական օրենսգրքի 10 հազար օրինակ տպելու համար, իսկ ոստիկանությանը` 234 մլն 224 հազար 800 դրամ, որից բյուջետային ծախսերի տնտեսագիտական դասակարգման «Գրասենյակային նյութեր և հագուստ» հոդվածով`  10,024.5 հազար դրամ, իսկ «Կապի ծառայություններ» հոդվածով՝ 224,200.3 հազար դրամ:

Միրզոյանը հավելեց, որ, բացի նշված գումարից, ընտրությունների անցկացման, կազմակերպման համար Հայաստանին ֆինանսական աջակցություն է ցուցաբերում նաև միջազգային հանրությունը: «Տարբեր դոնոր կազմակերպություններ հոգում են այս ծախսերի մի մասը, այդ թվում միջոցներ են  հատկացնելու տեսանկարահանող սարքերի համար»,- հայտնեց նա: