Քարոզարշավը կսկսվի նոյեմբերի 26-ից. ԿԸՀ-ն հաստատեց ընտրությունների ժամանակացույցը

Հայաստանի Կենտրոնական ընտրական հանձնաժողովն այսօր արտահերթ նիստ էր գումարել: Նիստում ԿԸՀ-ն հաստատեց 2018թ. դեկտեմբերի 9-ին կայանալիք ԱԺ արտահերթ ընտրությունների նախապատրաստման և անցկացման հիմնական միջոցառումների ժամանակացույցը:

«Կուսակցություններն ու դաշինքները կարող են իրենց հայտերը ներկայացնել մինչև նոյեմբերի 14-ը` ժամը 18։00-ն։ Քարոզչության ժամանակահատվածը նոյեմբերի 26-ից դեկտեմբերի 7-ն է. Ընտրական օրենսգրքով սահմանվել է 12-օրյա ժամկետ»,- տեղեկացրեց ԿԸՀ նախագահ Տիգրան Մուկուչյանը։

Նոյեմբերի 1-ին Ազգային ժողովն իրավունքի ուժով արձակվել է։ Նախագահի ստորագրած հրամանագրի համաձայն` արտահերթ խորհրդարանական ընտրությունները կանցկացվեն դեկտեմբերի 9-ին։