Սաուդյան Արաբիայի գլխավոր դատախազը կմեկնի Թուրքիա` արաբ լրագրողի սպանության գործով. Էրդողան

Թուրքիայի նախագահ Ռեջեփ Թայիփ Էրդողանը հայտնել է, որ Սաուդյան Արաբիայի գլխավոր դատախազը կմեկնի Թուրքիա` հոկտեմբերի 2-ին Ստամբուլում սաուդական հյուպատոսարանում սպանված արաբ ընդդիմադիր լրագրող Ջեմալ Խաշուկջիի գործով:

Ըստ DHA-ի` Էրդողանը ծիծաղելի է համարել ավելի վաղ սաուդական կողմի արած հայտարարություններն այն մասին, թե լրագրողը դուրս է եկել հյուպատոսարանի շենքից: «Այդ մանկամիտ հայտարարությունները պետության լրջության և մարդկայնության հետ անհամադրելի են: Հայտնի է, որ լրագրողը սպանվել է: Նրանք պետք է ցույց տան դիակը: Ասում են՝ այստեղից դուրս է եկել, մենք էլ ասում ենք՝ ապացուցեք: Կիրակի Սաուդյան Արաբիայի գլխավոր դատախազը Ստամբուլում հանդիպելու է մեր գլխավոր դատախազի հետ: Հանդիպման ընթացքում կքննարկվեն սպանության հետ կապված հարցեր»,- ասել է Թուրքիայի նախագահը: