Քոչարյանի կալանավորման դեմ վերաքննիչ բողոք ներկայացվեց

Քիչ առաջ ՀՀ երկրորդ նախագահ Ռոբերտ Քոչարյանի պաշտպանները ՀՀ վերաքննիչ քրեական դատարան են ներկայացնել նրա կալանավորման դեմ ներկայացված բողոքը: Այս մասին Yerkir.am-ի հետ զրույցում հայտնեց Քոչարյանի պաշտպան Արամ Օրբելյանը: Փաստաբանը տեղեկացրեց, որ դատարան է ներկայացվել նաև Քոչարյանի նկատմամբ ընտրված խափանման միջոցը անձնական երաշխավորությամբ փոխարինելու վերաբերյալ` 34 պատգամավորի ստորագրությամբ փաստաթուղթ: Նա նշեց, որ ստորագրահավաքը շարունակվում է:

Հիշեցնենք, որ հուլիսի 27-ին Երևանի ընդհանուր իրավասության դատարանի դատավոր Վաչե Մարգարյանը 8 ժամ տևած քննությունից հետո բավարարեց ՀՀ երկրորդ նախագահ Ռոբերտ Քոչարյանին կալանավորելու վերաբերյալ նախաքննական մարմնի ներկայացրած միջնորդությունը։ ՀՀ երկրորդ նախագահը կալանավորվեց 2 ամիս ժամկետով և տեղափոխվեց «Երևան-Կենտրոն» ՔԿՀ:

Հուլիսի 26-ին Ռոբերտ Քոչարյանը հրավիրվել էր ՀՀ հատուկ քննչական ծառայություն՝ Մարտի 1-ի գործով, որպես վկա, հարցաքննվելու: Ավելի ուշ երկրորդ նախագահին մեղադրանք առաջադրվեց ՀՀ քրեական օրենսգրքի 300.1-ին հոդվածի 1-ին մասով՝ այն բանի համար, որ նա, այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը:

Ռոբերտ Քոչարյանը «Երկիր Մեդիա» հեռուստաալիքին տված հարցազրույցում հայտարարել է, որ իրեն առաջադրված մեղադրանքը շինծու է: