Նախիջևանում իրավիճակը վերահսկելի է, անհանգստանալու ոչինչ չկա. ՀՀ ԶՈՒ ԳՇ պետ

Նախիջևանում իրավիճակը վերահսկելի է, անհանգստանալու ոչինչ չկա. այսօր կենտրոնական հավաքակայանում լրագրողների հետ զրույցում ասաց ՀՀ ԶՈւ գլխավոր շտաբի պետ Արտակ Դավթյանը:

Անդրադառնալով Ադրբեջանում մեկնարկած զորավարժությանը` գլխավոր շտաբի պետն ասաց. «Վերջին տարիներին արցախա–ադրբեջանական շփման գծում մշտապես լարվածություն կա։ Մշտապես Ադրբեջանը զորավարժություններ է անցկացնում։ Այդտեղ առանձնահատուկ ոչինչ չեմ տեսնում: Նրանց զորավարժություններին մենք ուշի ուշով հետևում ենք, մենք պատրաստ ենք ցանկացած իրավիճակի զարգացման: Նույն ձևով էլ մենք ենք, ըստ պլանների, զորավարժություններ անցկացնում, և նույն ձևով Ադրբեջանն է հետևում մեր զորավարժություններին»:

Գլխավոր շտաբի պետը, խոսելով ամառային զորակոչի մասին, նշեց, որ այսօրվա զորակոչին ՊՆ պատրաստվել էր բավականին երկար, շատ աշխատանքներ են տարվել հնարավոր խոչընդոտներից և դեպքերից խուսափելու համար:

Արտակ Դավթյանը միաժամանակ տեղեկացրեց, որ Նիկոլ Փաշինյանի կոչին արձագանքել է 300 զինծառայող: «Կոչից հետո ունենք մոտ 300 զինծառայող, որոնցից նվազագույնը 156 հոգին նախկինում խուսափող զինծառայողներ են, ներկայացել են և պատրաստ են անցնելու իրենց ծառայությանը»,- նշեց նա: