Նիկոլ Փաշինյանը հանձնարարել է ստուգումներ սկսել ՀՀ-ում շահագործվող բոլոր մետաղական հանքերում

ՀՀ վարչապետ Նիկոլ Փաշինյանը հանձնարարել է ստուգումներ սկսել ՀՀ-ում շահագործվող բոլոր մետաղական հանքերում: Այս մասին ֆեյսբուքյան ուղիղ միացմամբ տեղեկացրեց Նիկոլ Փաշինյանը: Նա նշեց, որ  բազմաթիվ ահազանգեր կան, որ այդ հանքերի շահագործումը կատարվում է` խախտելով օրենսդրական ու բնապահպանական նորմերը: Ահա ինչու այդ հարցում լինելու են հետևողական ու սկզբունքային:

Փաշինյանի խոսքով` նորմալ է, որ Հայաստանում ակտիվորեն քննարկվում են բնապահպանական խնդիրները, բայց նաև այդ հարցում պետք է լինի հավասարակշռված մոտեցում:

«Չենք կարող ասել, որ Հայաստանում հանքարդյունաբերությունը փակելու ենք, բայց մյուս կողմից, չենք կարող թույլ տալ, որ հանքարդյունաբերությունը իրականացվի այն պայմաններում, ինչ պայմաններում այսօր է տեղի ունենում: Բնապահպանական կանոնները, մեր տեղեկություններով, պատշաճ ձևով չեն պահպանվում: Բոլոր հանքերի գործունեությունը խստիվ պետք է համապատասխանեցնել բնապահպանական և օրենսդրական պահանջներին»,- ասաց Փաշինյանը: Բացի այդ տեղեկություններ կան, որ բազմաթիվ հանքեր չեն կատարել իրենց պարտավորությունները` վճարումները պետության հանդեպ, որոնք հասնում են մի քանի միլիոն դրամի: Փաշինյանի խոսքով` այդ ստուգումներին մասնակցելու են բնապահպանական հկ-ներ, լրագրողներ, որպեսզի բացառվի որևէ կոռուպցիոն ներազդեցություն: