Այն, ինչի համար Ալիևը վճարում է, մենք անվճար բերում ենք մեր դաշտ ու տարածում. Տիգրան Քոչարյան

Վերջին շրջանում Ադրբեջանը տեղեկատվական պայքարում մի քանի քայլ առաջ է գնացել. լրագրողների հետ հանդիպման ժամանակ ասաց տեղեկատվական անվտանգության փորձագետ Տիգրան Քոչարյանը:

Ըստ նրա՝ մեր հասարակությունը, որը նախկինում արդեն սովորել էր Ադրբեջանի սադրանքներին և կուլ չէր գնում դրանց, հիմա սկսել է Ադրբեջանի խայծը կուլ տալ: Որպես ասվածի վառ օրինակ` Քոչարյանը նշեց Գարեգին Նժդեհի արձանի շուրջ ստեղծված իրարանցումը: Փորձագետի հավաստմամբ՝ Նժդեհի արձանն ապամոնտաժելու պահանջը Ռուսաստանում բարձրացնում են Ադրբեջանի կողմից գնված փորձագետները. Գարեգին Նժդեհի անունը նացիզմի հետ կապելու հիմքում կանգնած են «Իզբորյան» ակումբի մարդիկ՝ Տարաս Շևչենկոն, քաղաքագետ Սերգեյ Մարկովը:

«Երկուսն էլ ներկա պահին ներկայություն չունեն ՌԴ իշխանությունում, ազդելու հնարավորություն էլ չունեն: Սրանք այն մարդիկ են, որոնք ՌԴ քաղաքական ու մեդիա դաշտում զբաղված են ադրբեջանական լոբբիով: Երբ տեսնեք, որ ռուս որևէ փորձագետ խոսում է Նժդեհի արձանի ապամոնտաժման մասին, պետք է անմիջապես հասկանալ, որ նրա ականջների հետևում Ադրբեջանն է ու Մարկովը, ով ՌԴ-ում Ադրբեջանի դրածոն է: Նժդեհի թեման հենց Մարկովն է գրգռում: Ադրբեջանը փոխել է խաղի կանոնները և սովորել ոչ թե բռի ձևով աշխատել, այլ ավելի զգույշ, ինչպես պետիցիայի դեպքում է. ստորագրահավաքի տեքստը գրել է Ալեքսանդր Փերենջիևը, ով Նժդեհի անունն ընդհանուրի մեջ է ներառել՝ տպավորություն ստեղծելու համար, թե թիրախը նա չէ»,- ասաց Քոչարյանը՝ հավելելով, որ Հայաստանի և Նժդեհի մասին խնդրագրում գրված է ձեռքի հետ, այսինքն՝ տպավորություն է, թե ձեռքի հետ է նշվում, որ Հայաստանը նույնպես հերոսացնում է ֆաշիզմի աջակիցներին:

Նրա խոսքով՝ Ադրբեջանը հասնում է իր նպատակին, քանի որ Հայաստանում էլ կան մարդիկ, որ Նժդեհի արձանի ապամոնտաժման հարցն օգտագործում են՝ հակառուսական տրամադրություններ արթնացնելով: Քոչարյանի մեկնաբանմամբ՝ ստացվում է ադրբեջանական քարոզչությունն անվճար բերում ենք հայկական դաշտ և այնպես անում, որ հայ-ռուսական հարաբերությունների ճակատը ճաքեր ունենա:

«Նժդեհի արձանի ապամոնտաժման թեման Ադրբեջանին այնքանով է ձեռնտու, որ նա ուղղակի ուզում է լարել հայ-ռուսական հարաբերությունները, Ռուսաստանին տրամադրել տեղում ապրող հայերի դեմ: Կարծիք կար, թե ՌԴ-ում այդ թեման հրահրողը՝ Մակրովը, Պուտինի վստահված անձն է, ո´չ, չկա նման բան, նա ուղղակի Ադրբեջանի դրածոն է, ով իր գործի համար լավ ֆինանսավորում է ստացել Հեյդար Ալիևի ֆոնդից»,- ասաց նա:

Տեղեկատվական անվտանգության փորձագետի խոսքով՝ այն, ինչի համար Ալիևը վճարում է, մենք անվճար բերում ենք մեր դաշտ ու տարածում: Ըստ Քոչարյանի՝ պետք է զգոն լինել ու հասկանալ՝ որտեղից է փչում քամին, քանի որ նման փորձեր էլի կլինեն. վերջին շրջանում Ադրբեջանի կողմից միտում է  նկատվում Ռուսաստանը տրամադրել հայերի դեմ: 

Հիշեցնենք, որ, ռուսական կայքերի հաղորդմամբ, ստորագրություններ են հավաքվում ընդդեմ ֆաշիզմի հերոսացման, և արդեն 200 հազար մարդ ստորագրել է այդ խնդրագիրը, որում նաև կա Նժդեհի արձանի ապամոնտաժման պահանջը: