«Մոնթե Մելքոնյան» վարժարան ընդունվելու համար առաջին անգամ մրցակցություն է եղել

Մոնթե Մելքոնյանի անվան ռազմամարզական վարժարանում ավարտվել է փաստաթղթերի ընդունման գործընթացը, և առաջին անգամ պատմության մեջ մրցույթ կա: Այս մասին այսօր, ի պատասխան Yerkir.am-ի հարցին, ասաց ՀՀ պաշտպանության նախարար Վիգեն Սարգսյանը:

Նրա խոսքով՝ մրցակցությունը երեք դիմորդ մեկ տեղի համար հարաբերակցությամբ է: «Դա շատ տպավորիչ արդյունք է»,- նշեց նախարարը և տեղեկացրեց, որ առաջիկա օրերին կմեկնարկի քննական շրջանը, և ըստ այդմ` կձևավորվի վարժարանի աշակերտական և մանկավարժական վերջնական կազմը:

«Սեպտեմբերի 1-ին Մոնթե Մելքոնյանի անվան վարժարանում մենք առիթ ենք ունենալու նոր մոնթեականներին դիմավորելու: Իրականում դա դառնալու է հանրապետության լավագույն ավագ դպրոցը»,- ասաց նա:

Ըստ Սարգսյանի՝ այս ցուցանիշը պայմանավորված է վարժարանի համար Դիլիջանում ստեղծված պայմաններով, այդ ուղղությամբ տարված հորդորով: «Համաձայնեք, որ հորդորն առանց աշխատանքի միայն քարոզչություն կլիներ»,- նշեց նա:

Նախարարը տեղեկացրեց, որ ընդունելության համար մրցույթ է լինելու նաև Արմենակ Խամփերյանցի անվան ռազմաուսումնական համալսարանում՝ երկուսը՝ մեկ տեղի համար հարաբերակցությամբ: