Թուրքիայում բողոքի ցույցի մասնակից ուսանողները ազատազրկման են դատապարտվել

2014 թվականին Թուրքիայի Մերսինի համալսարանում Հալեփչեի կոտորածի զոհերի հիշատակին նվիրված միջոցառում էր անցկացվել, որի մասնակից 9 ուսանող դատապարվել էր 1 տարի 8 ամսվա ազատազրկման: Նրանց «ահաբեկչական կազմակերպությանն անդամակցելու և դրա օգտին քարոզչություն անելու» մեղադրանք էր առաջադրվել. տեղեկացնում է Ermenihaber-ը:

Թուրքական «Demokrathaber» լրատվական կայքի տեղեկացմամբ` 1-ին ատյանի դատարանի որոշումից հետո ուսանողները դիմել էին Վերաքննիչ դատարան, որը վերահաստատել է 1-ին ատյանի դատարանի որոշումը:

Ուսանողներից մեկը դատարանի որոշումը մեկնաբանելիս գրել է. «Ցավալի է, որ Հալեփչեի կոտորածների դեմ բողոքը և զոհվածների ոգեկոչումը հանցանք է համարվում: Այժմ ես այս ոչ իրավաչափ որոշման հետևանքով պետք է բանտ գնամ»:

Մեկ այլ ուսանող նշում է, որ կոտորածների 26-րդ տարելիցին համալսարանի տարածքում ընդամենը հիշատակի քայլերթ էին կազմակերպել, որն ավարտվել էր մամուլի հայտարարությամբ: «Քայլերթի ընթացքում որևէ լարվածություն չի եղել: Որոշ ժամանակ հետո իմացա, որ 30 ուսանողի, այդ թվում` և իմ նկատմամբ հետաքննությունն է սկսվել: Մեկը պետք է բացատրություն տա, թե այդ երբ է Հալեփչեում կատարվածի դեմ բողոքի ակցիա կազմակերպելը դարձել հանցանք»:

Հիշեցնենք, որ 1988 թվականին մարտի 16-ին Հյուսիսային Իրաքի Հալեփչե բնակավայրում քիմիական զենքի կիրառման հետևանքով մոտ 5 հազար մարդ էր մահացել: