Քաթարի քաղաքացիները ՀՀ մուտք կգործեն առանց վիզայի

Այսօր կառավարության նիստում ԱԳ  նախարարի տեղակալ Շավարշ Քոչարյանը ներկայացրեց Քաթարի Հանրապետության քաղաքացիների՝ Հայաստան առանց մուտքի վիզայի մուտք գործելու վերաբերյալ նախագիծը, որը Հայաստանի մուտքի ազատականացման ընդհանուր քաղաքականության համատեքստում է:

«Որոշման ընդունումը ինչպես կնպաստի զբոսաշրջության խթանմանը, այնպես էլ հիմք կհանդիսանա երկկողմ համագործակցության մի շարք նոր ոլորտների ուրվագծման և զարգացման համար»,- ասաց Քոչարյանը և նշեց, որ Քաթարի քաղաքացիների համար հունիսի 10-ից կսահմանվի առանց մուտքի վիզայի ռեժիմ:

Վարչապետ Կարեն Կարապետյանը հետաքրքրվեց, թե, ընդհանրապես, զբոսաշրջության կոմիտեից ցանկ ունե՞նք, թե որ երկրների հետ է վիզաների արտոնյալ ռեժիմը ցանկալի, որպեսզի զբոսաշրջությունը խթանվի:  Շավարշ Քոչարյանը հայտնեց, որ հիմա քննարկվում է ևս մի շարք  երկրների հետ վիզային ռեժիմի ազատականացման խնդիրը: