Ամսական 15 հազար փախստական ուղարկենք` խելքներդ թռցնեք. Թուրքիայի ՆԳ նախարարը՝ Եվրոպային

Թուրքիայի ՆԳ նախարար Սուլեյման Սոյլուն սպառնացել է Եվրոպային:

Ըստ Demokrathaber-ի՝ խոսքն ուղղելով Հոլանդիային և Գերմանիային՝ թուրք նախարարն ասել է. «Մենք ընտրությունները ձեզ համա՞ր ենք անում, ձե՞ր սահմանադրությունն է փոխվելու: Դուք ի՞նչ գործ ունեք մեր ներքին խնդիրների հետ: Եթե շատ եք ուզում՝ ամսական 15 հազար փախստական ուղարկենք` խելքներդ թռցնեք»:

Թուրք նախարարն իր խոսքում նաև հիշատակել է Թուրքիայի՝ ԵՄ անդամակցության մասին: «Ի՞նչ է՝ Թուրքիային ԵՄ անդամ դարձրի՞ք, թե՞ աջակցեցիք ահաբեկչության դեմ պայքարին»,- ասել է Սոյլուն՝ հերթական անգամ հորդորելով «չմիջամտել Թուրքիայի ներքին հարցերին»:

Հիշեցնենք, որ Գերմանիայի, Հոլանդիայի և եվրոպական մի շարք երկրների հետ լարվածություն էր առաջացել այն բանից հետո, երբ վերջիններս չէին թույլատրել կամ չեղարկել էին թուրքական իշխանությունների նախընտրական հանրահավաքները: