Այսօր կանանց միջազգային տոնն է

Մարտի 8-ը ամբողջ աշխարհում նշվում է որպես Կանանց միջազգային օր: Այս օրվա հետ կապված առաջին պատմական իրադարձությունը 1857 թվականի մարտի 8-ն էր, երբ Նյու Յորքի տեքստիլ գործարանների կին աշխատողներն իրենց իրավունքների պաշտպանության համար քայլերթով անցան քաղաքի փողոցներով: Պատճառը ցածր աշխատավարձն ու աշխատանքի վատ պայմաններն էին:

Տոնի պատմությունն ավանդաբար կապվում է Կլարա Ցետկինի անվան հետ, ով ստեղծել էր կանանցից կազմած հեղափոխական ջոկատ: Կանանց միջազգային օրն առաջինը նշվեց 1911 թվականի մարտի 19-ին չորս երկրում՝ Ավստրիա, Գերմանիա, Դանիա, Շվեյցարիա: 

ՄԱԿ-ը 1975 թվականը ճանաչեց Կանանց միջազգային տարի, որից հետո նույն կառույցը 1977 թվականին մարտի 8-ն արդեն հայտարարեց Կանանց միջազգային տոն:

Հայաստանի Հանրապետության անկախությունից հետո որոշ ժամանակ մարտի 8-ը որեպս կանանց տոն չնշվեց, սակայն ժողովուրդը ավանդաբար նշում էր մարտի 8-ը և այսօր մարտի 8-ը ոչ աշխատանքային է:

Սա, իհարկե, պատմական ակնարկ էր, իսկ Yerkir.am-ի ջերմ մաղթանքները ներկայացնում ենք ստորև:

Սիրելի կանայք ու աղջիկներ

Թող խաղաղությամբ լեցուն լինի ձեր ամեն օրը. զինվոր որդիները, եղբայրներն ու սիրելի տղամարդիկ իրենց ամուր թիկունքով պահպանեն ձեզ:

Թող սիրով լեցուն լինի ձեր ողջ կյանքը. ամեն պահ ձեզ սեր նվիրեն, նվիրողը լինի ասպետ, թե` հասարակ հայ տղամարդ:

Թող ձեր կյանքը ողողված լինի ծաղիկներով ու ծաղիկների գույներով. այդ գունային գամմայի մեջ իր ուրույն տեղը գտնի երջանկության համար անհրաժեշտ դրամագլուխը:

Եվ, ի վերջո, թող մեր բոլոր վերոնշյալ ցանկությունները իսկապես իրողություն լինեն բոլորիդ կյանքում: