Մենք առաջարկում ենք պետական ծառայողի արժանավայել վարձատրություն. Արծվիկ Մինասյան

Այսօր մեկնարկեց ՀՅԴ նախընտրական քարոզարշավը: ՀՅԴ համամասնական ցուցակի 6-րդ հորիզոնականը զբաղեցնող` ՀՀ բնապահպանության նախարար Արծվիկ Մինասյանն իր ելույթում նշեց, որ պետական կառավարման համակարգը հիմնովին վերանայելու անհրաժեշտություն կա:

«Մեզ համար սկզբունքային նշանակություն ունի, մեր առաջնահերթությունների մեջ է այն, որ պետական ծառայողը պետք է վստահ լինի` վարձատրությունը, որը տրվում է նրան, ապահովելու  է  թե' նրա սոցիալական, թե' նրա պարտականությունների լիարժեք իրականացման ֆինանսավորումը, որպեսզի նրա մոտ ի հայտ չգան կոռուպցիոն այս կամ այն դրսևորումները: Այս հենքի վրա է, որ մենք առաջարկում ենք հակակոռուպցիոն այնպիսի մարմնի ստեղծում, որը կներառի հասարակության տարբեր շերտերի, ընդդիմության ակտիվ մասնակցությունը: Մենք առաջարկում ենք պետական ծառայության այնպիսի սկզբունքներ, որոնք հիմնված են հայրենասիրության, պատասխանատվության և պրոֆեսիոնալիզմի վրա»,- ասաց Արծվիկ Մինասյանը:

Նրա խոսքով` ՀՅԴ-ն հասնելու է նրան, որ երկրի բնական ռեսուրսները` հողը, ջուրը, ընդերքը,  մթնոլորտը, կենդանական ու բուսական աշխարհը, որպես ժողովրդի սեփականություն, ծառայեն հենց ժողովրդին ու քաղաքացուն: