Ադրբեջանը պատրաստ է Մոսկվայում մասնակցել եռակողմ հանդիպման. Մամեդյարով

Ադրբեջանը պատրաստ է մասնակցել Ռուսաստանի, Հայաստանի և Ադրբեջանի ԱԳ ղեկավարների` Ղարաբաղյան կարգավորման հարցով հանդիպմանը Մոսկվայում, բայց դեռ կոնկրետ առաջարկներ չկան. РИА Новости-ին տված հարցազրույցում ասել է Ադրբեջանի արտգործնախարար Էլմար Մամեդյարովը:

«Գաղափարը հնչեց, երբ ես Մոսկվայում էի: Սերգեյ Վիկտորովիչը (Լավրովը) առաջարկեց Ռուսաստանի, Հայաստանի և Ադրբեջանի ԱԳ ղեկավարների եռակողմ հանդիպում անցկացնել: Ես ասացի` խնդրեմ, ես պատրաստ եմ»,- հայտարարել է նա:

Մամեդյարովը հավելել է, որ ժամկետներ չեն քննարկվել: «Դա պահանջում է գրաֆիկների համաձայնեցում: Դեռևս կոնկրետ ժամկետներ չեն առաջարկվել, բայց մեր սկզբունքային համաձայնությունը կա»,- շեշտել է նա: