Մեծ Բրիտանիայում պետպատվերով վիրահատվելու համար սպասում են 3-ից ավելի տարիներ, մեզ մոտ` 2-3 ամիս

Այսօր ՀՀ առողջապահության նախարար Լևոն Ալթունյանը, ամփոփելով ընթացիկ տարվա աշխատանքները, անդրադարձավ պետպատվերին: Նա նշեց, որ տեղյակ է` լինում են դեպքեր, երբ պետպատվերին տրամադրված գումարը սպառվում է, սակայն հերթագրման մեջ դեռ որոշ մարդիկ են մնում: Ըստ Ալթունյանի` իրենք ամեն ինչ անում են, որ գումարների բաշխման թափանցիկությունն ապահովեն, և շուտով այդ գործընթացին կարող ենք հետևել օնլայն, և յուրաքանչյուրը կարող է հետևել շրջանառությանը:

«Համոզված եմ, որ նման կերպ հնարավոր չարաշահումների` անգամ ցանկությունը կկանխենք: Իսկ պետպատվերի գումարները, այո, կարող են վերջանալ 1-2 ամիս շուտ, դա պատահում է, ամբողջ աշխարհում է այդպես: Ավելին` Մեծ Բրիտանիայում պետպատվերով վիրահատվելու համար հիվանդները սպասում են 2-3 և ավելի տարիներ, իսկ մեզ մոտ 2-3 ամսվա մասին է խոսքը: Ուղղակի բժիշկը պարտավոր է տարանջատել շտապ բուժօգնությունն ու այն հիվանդին, ում կարելի է հերթագրել ու ամիսներ անց տրամադրել ծառայությունը»,- ասաց նախարարը: