Կառավարությունը դարձյալ ԱԺ արտահերթ նիստ է հրավիրում

Այսօր կառավարության նիստում կառավարության աշխատակազմի ղեկավար Դավիթ Հարությունյանը նշեց, որ առաջարկվում է դեկտեմբերի 13-ին հրավիրել ԱԺ արտահերթ նիստ: Նա մեկ օր  ժամանակ խնդրեց հստակեցումների համար, քանի որ նախատեսված է օրակարգում ներառել «Ապօրինի հարստացման քրեականացման մասին»,  «Հարկային արտոնությունների մասին» օրենքների  փաթեթը և «Պետական նպաստների մասին» օրենքում փոփոխություններ կատարելու մասին հարցը:

Տնտեսական զարգացման և ներդրումների նախարար Սուրեն Կարայանը առաջարկեց օրակարգում ներառել նաև Համաշխարհային բանկի վարկային ծրագիրը` կապված զբոսաշրջության զարգացման հետ:

Տարածքային կառավարման և զարգացման նախարար Դավիթ Լոքյանն էլ հետաքրքրվեց` այդ ԱԺ արտահերթ նիստը վերջի՞նն է լինելու, թե փետրվարին կունենան ԱԺ նիստեր, որովհետև «Վարչատարածքային կառավարման օրենքում» փոփոխություններ անելու մասին հարցը պետք է ներկայացնել ԱԺ քննարկմանը և պետք է հասկանալ, թե դա երբ պետք է ներկայացնել:

Դավիթ Լոքյանին պատասխանեց կառավարության աշխատակազմի ղեկավար-նախարար Դավիթ Հարությունանը` ասելով, որ ԱԺ-ն շարունակելու է իր բնականոն աշխատանքները մինչև նոր ԱԺ-ի ձևավորումը:

Վարչապետը հարցրեց. «Պարո'ն Լոքյան, Դուք ի՞նչ նկատի ունեիք»:

Լոքյանն էլ պատասխանեց, որ իրեն հետաքրքրում է` փետրվար ամսին ԱԺ նիստեր կգումարվե՞ն, թե՞ ոչ:

Նշենք, որ կան մտահոգություններ առաջիկա խորհրդարանական ընտրություններին նախորդող նախընտրական գործընթացների վերաբերյալ, որովհետև հնարավոր է` շատ պատգամավորներ զբաղված լինեն նախընտրական գործընթացներով, չներկայանան ԱԺ նիստերին, և ԱԺ-ն էլ նիստեր չգումարի քվորում չապահովելու պատճառով: