Վիգեն Սարգսյանը ՌԴ զինված ուժերի գլխավոր շտաբի ռազմական ակադեմիայում դասախոսությամբ է հանդես եղել

Պաշտոնական այցով Ռուսաստանի Դաշնությունում գտնվող ՀՀ պաշտպանության նախարար Վիգեն Սարգսյանը նոյեմբերի 29-ին այցելել է ՌԴ զինված ուժերի գլխավոր շտաբի ռազմական ակադեմիա:

ՌԴ զինված ուժերի գլխավոր շտաբի ռազմական ակադեմիայում Վիգեն Սարգսյանը հանդես է եղել դասախոսությամբ: Ակադեմիայի շուրջ 400 ունկնդիրներին են ներկայացվել հայ-ռուսական ռազմական և ռազմատեխնիկական առաջնահերթությունները, տարածաշրջանային անվտանգության մարտահրավերներն ու սպառնալիքները: ՀՀ պաշտպանության նախարարը պատասխանել է նաև ակադեմիայի ունկնդիրների հարցերին:

ՀՀ պաշտպանական գերատեսչության ղեկավարը ծանոթացել է ռազմական ակադեմիայի ուսումնանյութական բազային, ուսումնական ծրագրերին, շրջել է ՌԴ առաջատար բարձրագույն ռազմաուսումնական հաստատության թանգարանում:

Նույն օրը ՀՀ պաշտպանության նախարարը հանդիպել է ՌԴ Պետական Դումայի առաջին փոխնախագահ Ալեքսանդր Ժուրովի հետ: Հանդիպման ընթացքում քննարկվել են հայ-ռուսական ռազմավարական հարաբերությունները, ընդգծվել է երկու պետությունների օրենսդիր և գործադիր մարմինների փոխգործակցության բարձր մակարդակը:

Վիգեն Սարգսյանը շեշտել է երկկողմ և բազմակողմ ձևաչափով հայ-ռուսական ռազմավարական գործընկերության կարևորությունը տարածաշրջանային անվտանգության և կայունության ապահովման համատեքստում:

Կողմերը քննարկել են նաև «Հայաստանի Հանրապետության զինված ուժերի և Ռուսաստանի Դաշնության զինված ուժերի զորքերի (ուժերի) Միացյալ խմբավորման մասին» համաձայնագիրը, որի ստորագրումը նախատեսված է ՀՀ պաշտպանության նախարարի պաշտոնական այցի ընթացքում:

Նոյեմբերի 29-ի երեկոյան Մոսկվայի հայկական եկեղեցական համալիրի դահլիճում Վիգեն Սարգսյանը հանդիպել է Մոսկվայի կայազորի ռազմաուսումնական հաստատություններում սովորող հայ կուրսանտների և ունկնդիրների հետ: ՀՀ պաշտպանության նախարարը ներկայացրել է զինված ուժերում իրականացվող աշխատանքներն ու անելիքների վերաբերյալ, ներկայացրել է զինված ուժերի ձեռքբերումներն ու բացթողումներ, մանրամասնել է «Ազգ-բանակ» գաղափարի դրույթները, պատասխանել է հանդիպման մասնակիցների հարցերին:

 ՀՀ ՊՆ