Սովետաշենի զիբիլանոցում գինովցած բոմժերի սեռական հարաբերությունների վաղաժամկետ ծնունդ. Գեղամյան

Այսօր ԱԺ արտահերթ նիստում, ուր քննարկվում էր «Սպառողների պաշտպանության մասին» օրենքում փոփոխություններ անելու մասին հարցը, ելույթ ունեցավ ԱԺ ՀՀԿ խմբակցության պատգամավոր Արտաշես Գեղամյանը: Ըստ նրա` սպառող ասելով` պետք է նկատի ունենալ նաև տեղեկատվական սպառումը, և որ այսօր ոչ ոք ապահովագրված չէ տեղեկատվական դիվերսիաներից: Պատգամավորը նշեց, որ խոսքը վերաբերում է ապրիլյան ռազմական բախումներից հետո մինչ այժմ եղած տեղեկատվական հոսքերին:

Նա հիշեցրեց, որ գիրք է հրատարակել Լեռնային Ղարաբաղի խնդրի մասին և բաժանել ԵԱՀԿ ԽՎ ղեկավարությանը, համանախագահ երկրների ներկայացուցիչներին:

Հետո պատգամավորը զայրացավ, որ լրատվական դաշտն անհանդուրժող գտնվեց իր հանդեպ, և որոշ լրատվամիջոցների անվանեց «կոյուղաջրի համբավ ունեցող»: Պատգամավորի խոսքով` երբ երկրորդ գիրքը հրատարակեց ԼՂ խնդրի վերաբերյալ, որը թարգմանվեց յոթ լեզուներով, թուրք-ադրբեջանական կայքերը սկսեցին հայհոյել իրեն, որովհետև, ըստ նրա, իր գրքերը սարսափելի խոցելի էին դարձնում Ադրբեջանին ու Թուրքիային:

«Եթե հայեր են կանգնած այդ ադրբեջանական կայքերի ետևում, ապա նրանք ոչ այլ ոք են, քան Սովետաշենի զիբիլանոցում գինովցած բոմժերի սեռական հարաբերությունների վաղաժամկետ ծնունդ: Դիմում եմ Սամվել Բաբայանին ու Վարդան Օսկանյանին` Ձեզ գովերգող կայքերի գյամերը քաշեք: Եթե ձեզ թվում ա ես այս կամ այն դուրս ընգած լրագրողին պետք է քննադատեմ, ապա սխալվում եք, եթե սկսեմ քննադատել, ստիպված կլինեք ժամանակավորապես ձեր պրապիսկան փոխել»,- զայրացած ասաց Գեղամյանը:

Նշենք, որ ելույթի վերջում պատգամավորը ռուսերենով կարդաց Պուտինի ողջույնի խոսքը՝ ուղղված ՀՀԿ-ին: