Ինչպե՞ս է մեկ ամսում հավաքագրվել 100 մլրդ դրամ հարկ

ՊԵԿ փոխնախագահ Վախթանգ Միրումյանն այսօր լրագրողների հետ զրույցում պատասխանեց հարցին, թե ինչպե՞ս են ապրիլ ամսին հավաքագրել 100 միլիարդ դրամ հարկ, ինչի մասին հայտարարել էր Սերժ Սարգսյանը:

Ըստ ՊԵԿ փոխնախագահի` հարկային եկամուտների վճարումները հիմնականում հարկային վարչարարության շարունակական կատարելագործման արդյունք են: Նրա խոսքով` գումարները հավաքագրվել են խոշոր տնտեսվարողներից, և գումարները հիմնականում գոյացել են ստվերը կրճատելու արդյունքում:

ՊԵԿ փոխնախագահը հրաժարվեց ասել, թե կոնկրետ որ խոշոր ընկերություններին են դուրս բերել ստվերից: «Առաջին հազար խոշորների ցանկը վերցրեք, նայեք»,- ասաց նա:

Հարցին, թե ինչո՞ւ քրեական գործ չի հարուցվել նայդ խոշոր ընկերությունների դեմ, որոնք մինչև ապրիլ ամիսը գտնվել են ստվերում, Միրումյանը պատասխանեց, թե, ըստ ՔՕ-ի, քրեական գործ է հարուցվում, եթե տնտեսվարողները հրաժարվում են վճարել գումարը, բայց այս դեպքում ընկերությունները վճարել են, և նրանց դեմ հարուցված քրեական գործերը կասեցվել են: Իսկ թե կոնկրետ ո՞ր խոշորների դեմ հարուցված քրեական գործերն են կասեցվել, ՊԵԿ փոխնախագահը դժվարացավ պատասխանել` հորդորելով գրավոր հարցում ուղարկել: