Երեւանում 6-ամյա երեխային նախ «Վոլկսվագեն»-ն է վրաերթի ենթարկել, ապա «Գազելը»

ՀՀ քննչական կոմիտեի Երևան քաղաքի քննչական վարչությունում հարուցվել է քրեական գործ՝ 6-ամյա երեխայի վրաերթի դեպքի առթիվ:

Նախնական տվյալներով՝ 2016թ. մայիսի 07-ին՝ ժամը 12:10-ի սահմաններում, Երևան քաղաքի Նորագավիթ 1-ին և 8-րդ փողոցների խաչմերուկում «Վոլկսվագեն» մակնիշի ավտոմեքենան վրաերթի է ենթարկել անչափահաս, 2009թ. ծնված Վլադիմիրին, այնուհետև երեխան վրաերթի է ենթարկվել «ԳԱԶ-322132» մակնիշի միկրոավտոբուսի կողմից: Վերջինիս վարորդը, թողնելով ճանապարհատրանսպորտային պատահարի վայրը, հեռացել է: Երեխան հիվանդանոց տեղափոխվելու ճանապարհին մահացել է:

Դեպքի առթիվ Երևան քաղաքի քննչական վարչությունում հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասով և 244-րդ հոդվածով: Կատարվել է դեպքի վայրի զննություն:

Ձեռնարկվում են անհրաժեշտ քննչական գործողություններ՝ երեխային վրաերթի ենթարկելու դեպքի բոլոր հանգամանքները պարզելու ուղղությամբ:

Քրեական գործի էական հանգամանքները պարզելու համար նշանակվել են դատաբժշական և դատաավտոտեխնիկան փորձաքննություններ:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: